ڈرگ ایکٹ 2017 کیخلاف پنجاب کے مختلف شہروں کے میڈیکل اسٹورز کی ہڑتال

لاہور: پنجاب ڈرگ ایکٹ 2017 کےخلاف صوبے کے مختلف شہروں کے میڈیکل اسٹورز مالکان کی ہڑتال جاری ہے۔

پنجاب ڈرگ ایکٹ 2017 کے خلاف ملتان، حافظ آباد، کمالیہ، ٹوبہ ٹیک سنگھ، راجن پور، جہانیاں، بھکر اور گوجرانوالہ میں میڈیکل اسٹورز بند ہیں۔

میڈیکل اسٹورز مالکان کی جانب سے کی جانے والی ہڑتال کے باعث مریضوں کو ادویات کے حصول میں شدید مشکلات کا سامنا ہے۔

ملتان میں گھنٹا گھر چوک پر میڈیکل اسٹورز مالکان کی جانب سے ڈرگ ایکٹ کے خلاف احتجاج کیا گیا اور مظاہرین نے اعلان کیا کہ مطالبات تسلیم نہ ہونے تک ہڑتال جاری رہے گی۔

لاہور پریس کلب کے باہر ترمیمی ڈرگ ایکٹ کے خلاف فارما سیکٹر کی جانب سے احتجاج کیا گیا، مظاہرین نے مطالبہ کیا کہ ڈرگ ایکٹ کالا قانون ہے اور اسے فوری واپس لیا جائے، میڈیکل اسٹورز اور لیبارٹریوں پر بھی چھاپوں کا سلسلہ بند کیا جائے۔

یاد رہے کہ ڈرگ ایکٹ 2017 کے تحت میڈیکل اسٹور میں ہر وقت ایک ماہر فارماسسٹ کی موجود گی لازمی قرار دی گئی ہے اور میڈیکل اسٹور میں گندگی پر بھی سزا ہو گی۔

نئے ایکٹ کے تحت جعلی ادویات بنانے والوں کے خلاف سزاؤں میں اضافہ کیا گیا ہے اور بغیر لائسنس ادویات بنانے یا فروخت کرنے والوں کو 3 سے 10 سال تک قید کی سزا ہوگی جب کہ 5 کروڑ روپے تک جرمانہ عائد کیا جاسکے گا۔