صرف نواز شریف نہیں تمام لوگوں کا احتساب ضروری ہے ، سراج الحق

کراچی: جماعت اسلامی کے امیر سینیٹر سراج الحق کا کہنا ہے کہ نواز شریف کے احتساب سے مسئلہ حل نہیں ہوگا بلکہ ان تمام لوگوں کا بھی احتساب ضروری ہے جنہوں نے عوام اور ملک کے اداروں کو لوٹ کر قوم کو مقروض کیا ہے۔

کراچی کے علاقے بنارس میں انتخابی ریلی سے خطاب کرتے ہوئے سینیٹر سراج الحق کا کہنا تھا کہ 40 سالوں میں شہر میں پانی کا ایسا بحران نہیں آیا، حکمرانوں کے لیے تو فرانس سے منرل واٹر آجاتا ہے لیکن یہاں لمبی لمبی قطاروں میں لوگ پانی کے لیے کھڑے ہوتے ہیں۔

انہوں نے کہا کہ کراچی میں بار بار متحدہ قومی موومنٹ اور پیپلز پارٹی کو موقع ملا لیکن انہوں نے حق ادا نہیں کیا اور مسائل میں اضافے ہی کیے ہیں جب کہ متحدہ مجلس عمل ایک کلین اور گرین پاکستان چاہتی ہے۔ 

سراج الحق کا کہنا تھا کہ حکمران خود تو امیر ہوگئے لیکن عوام کو غریب کرگئے ہیں، ملک کے بیروزگاروں کو روزگار نہیں دے سکے ہیں لہذا حکمرانوں کو شرم کرنی چاہیے۔

انہوں نے کہا کہ شہر کی ہر گلی و سڑک موہن جودڑو کے کھنڈرات کا منظر پیش کررہی ہے لیکن 25 سال تک اس شہر کے اقتدار پر قبضہ کرنے والوں نے مایوسی کے علاوہ کچھ نہیں دیا ہے۔

ان کا کہنا ہے کہ سیاسی جماعتیں عوامی مفاد کے بجائے اپنے مفادات کے لیے آپس میں لڑ رہی ہیں اور ایک دوسرے کے ساتھ مل رہی ہیں۔

سراج الحق کا کہنا تھا کہ نواز شریف کے داماد کیپٹن (ر) صفدر کی گرفتاری خوش آئند ہے لیکن اس کے علاوہ پانامہ اسکینڈل میں ملوث 436 لوگوں سے زائد افراد کی فہرست چیف جسٹس کے سامنے پیش کی لیکن میں حیران ہوں کہ چیف جسٹس نے اب تک اس پر ایکشن نہیں لیا ہے۔

ان کا کہنا تھا کہ ہم احتساب چاہتے ہیں اور بے لاگ چاہتے ہیں، اگر یہ لوگ احتساب کے اس عمل کو مکمل نہیں کرسکے تو عوام 25 جولائی کو یوم احتساب منائیں گے۔ 

انہوں نے کہا کہ نواز شریف کے احتساب سے مسئلہ حل نہیں ہوگا، ان تمام لوگوں کا بھی احتساب ضروری ہے جنہوں نے عوام اور ملک کے اداروں کو لوٹ کر قوم کو مقروض کیا ہے، ہم تمام ڈاکوؤں کا احتساب ہوتا ہوا دیکھنا چاہتے ہیں۔