بھارت میں پُل کا ایک حصہ گرنے سے دو خواتین سمیت 5 افراد ہلاک
14 مارچ ، 2019
بھارت کے شہر ممبئی میں راہگیروں کیلئے بنائے جانے والے پُل کا ایک حصہ گرگیا جس کے نتیجے میں دو خواتین سمیت 5 افراد ہلاک اور 34 زخمی ہو گئے۔
پولیس کے مطابق حادثہ مقامی ریلوے اسٹیشن کے نزدیک پیش آیا، پُل پر مرمت کا کام جاری تھا جس کے دوران حادثہ پیش آیا۔
واقعے کے بعد زخمیوں کو اسپتال منتقل کردیا گیا جبکہ ہلاکتوں میں اضافے کا خدشہ بھی ظاہر کیا جارہا ہے۔
یہ پیڈسٹرین برج 1984 میں قائم کیا گیا تھا اور روزانہ لاکھوں افراد اس پل کو سڑک عبور کرنے کیلئے استعمال کرتے ہیں۔
متعلقہ حکام نے واقعے کی مزید تحقیقات کا آغاز کردیا ہے۔ بھارتی وزیراعظم نریندر مودی نے واقعے پر افسوس کا اظہار کیا ہے۔
