ٹی وی اینکرز پر پابندی سے متعلق پیمرا کا نوٹیفکیشن معطل

لاہور ہائیکورٹ نے پاکستان الیکٹرانک میڈیا ریگولیٹری اتھارٹی (پیمرا)  کے  میڈیا اینکرز کے ٹی وی شوز میں بطور مہمان شرکت پر پابندی کے احکامات پر عمل درآمد سے روک دیا۔

میڈیا اینکرز کے ٹی وی شوز میں بطور مہمان شرکت پر پابندی کے خلاف درخواست پر سماعت لاہور  کی اعلیٰ عدالت میں جسٹس شاہد وحید نے کی جس میں وفاقی وزارت اطلاعات و نشریات اور پیمرا کو فریق بنایا گیا۔

سماعت کے دوران درخواست  گزار نے مؤقف اختیار کیا کہ پیمرا نے28 اکتوبر کو صحافیوں کے بطور تجزیہ کار دوسرے ٹی وی شوز میں شرکت پر پابندی لگائی تھی۔ اس کے علاوہ مرضی کے مہمان بلانے پر بھی پابندی عائد کی تھی، ساتھ ہی صحافیوں کو ٹی وی شو میں زیر بحث موضوع پر رائے دینےسے بھی روکا گیا۔

اپنا شو کرنے والے اینکرز کے دوسرے شوز میں بطور تجزیہ کار شرکت پر پابندی

صحافیوں اور اینکرز نے پیمرا کی نئی پابندی کوآمرانہ قرار دیتے ہوئے نوٹیفکیشن واپس لینے کا مطالبہ کردیا

درخواست گزار  نے عدالت کو بتایا کہ پیمرا آرڈیننس کی دفعہ 27 کے تحت مخصوص حالات میں کسی ٹی وی پروگرام پر  پابندی لگا سکتا ہے لیکن  یہ ہدایت نامہ آئین کے آرٹیکل 9 سے متصادم ہے۔

بعدازاں درخواست گزار نے عدالت سے استدعا کی کہ درخواست کے حتمی فیصلے تک پیمرا کا ہدایت نامہ معطل کیا جائے  اور  صحافیوں کے ٹی وی پروگراموں میں شرکت پر پابندی کےاحکامات کالعدم دیئے جائیں۔

لاہور ہائیکورٹ نے درخواست گزار کے دلائل سننے کے بعد ٹی وی شوز کرنے والے اینکرز کے دوسرے شوز میں بطور مہمان تجزیہ کار شرکت پر پابندی کا نوٹیفکیشن معطل کر  دیا۔ 

یاد رہے کہ پیمرا نے تمام نجی ٹی وی چینلز کو ایک نوٹس کے ذریعے آگاہ کیا تھا کہ تمام چینلز ٹاک شوز میں اچھی شہرت اور  وسیع تجربہ رکھنے والے مہمان بُلائیں ورنہ اُن کے خلاف پیمرا ایکٹ کے تحت کارروائی عمل میں لائی جائے گی۔

بعدازاں العزیزیہ ریفرنس میں نواز شریف کی طبی بنیادوں پر ضمانت کو ڈیل قرار دینے پر اینکر پرسنز کے خلاف توہین عدالت کیس کی سماعت کے دوران اسلام آباد ہائیکورٹ نے چیئرمین پاکستان الیکٹرانک میڈیا ریگولیٹری اتھارٹی (پیمرا) کو شوکاز نوٹس جاری کرتے ہوئے جواب طلب کیا تھا۔

اینکرز کیخلاف توہین عدالت کیس: چیف جسٹس اسلام آباد ہائیکورٹ چیئرمین پیمرا پر برہم

آپ کام نہیں کرتے، عدالتی فیصلوں کا انتظارکرتے اور پھران کاغلط استعمال کرتےہیں، اینکرپرسنز کےخلاف توہین عدالت کیس کی سماعت کےدوران اسلام آباد ہائیکورٹ کے چیف جسٹس کے ریمارکس

اینکرز پر پابندی: تحریک انصاف کے اپنے رہنما پیمرا پر برس پڑے

وفاقی وزیر برائے سائنس اینڈ ٹیکنالوجی فواد چوہدری نے نوٹیفکیشن کو احمقانہ اور غیرضروری قرار دے دیا، شیریں مزاری اور اسد عمر نے بھی فیصلے پر تنقید کی