ڈیرہ غازی خان … ڈیرہ غازی خان میں صبح سویرے ایک بار پھر موسلا دھار بارش کا سلسلہ شروع ہوگیا ہے، کوہ سلیمان کے پہاڑی سلسلوں سے آنے والے سیلابی ریلے سے ڈیرہ غازی خان کینال میں شگاف پڑگیا اور شہر میں داخل ہونیوالے سیلابی پانی اور ہونے والی بارش نے آدھے شہر کو ڈبو کر رکھ دیا ہے دوسری جانب راجن پور اور تونسہ شریف میں بھی سیلابی پانی شہر میں داخل ہوگیا جس کے باعث شہریوں شدید مشکلات کا سامنا ہے۔ ڈیرہ غازی خان میں داخل ہونے والے سیلابی پانی کے ساتھ ہونیوالی موسلادھار بارش سے محکمہ پبلک ہیلتھ دفتر، ریلوے روڈ، بارڈر ملٹری پولیس لائن، انڈس کالونی سمیت متعدد علاقے زیر آب آگئے ہیں اور کئی فٹ تک پانی گھروں میں داخل ہوگیا ہے۔ کنٹرولر ریسکیو ٹیم انچارج محمد زبیر کے مطابق ریسکیو کا عملہ مختلف علاقوں میں پھنسے لوگوں کو نکالنے کا کام کررہا ہے جبکہ کمشنر ڈی جی خان طارق محمود نے دعویٰ کیا ہے کہ شہر میں پانی کا لیول کم ہورہا ہے اور اب تک ہزاروں لوگوں کو ریسکیو کیا جاچکا ہے۔ ملک بھر میں شدید بارشوں کا سلسلہ جاری ہے اور پنجاب کے علاقے ڈیرہ غازی خان، راجن پور اور تونسہ شریف میں پہاڑی ندی نالوں میں طغیانی کے بعد بارش اور سیلابی پانی شہر تک پہنچ گیا جبکہ صبح سویرے ڈیرہ غازی خان میں موسلا دھار بارش کا ایک بار پھر شروع ہوگئی ہے، بلاک 37، گئو شالہ، ریلوے پلی اور ملحقہ علاقوں میں سیلابی پانی گھروں میں داخل ہوگیا، ضلعی انتظامیہ نے شہر میں ہنگامی حالات کا اعلان کردیا ہے۔ بارش کے باعث بجلی کی فراہمی معطل ہونے سے شہر مکمل طور پر اندھیرے میں ڈوبا رہا۔ کمشنر ڈیرہ غازی خان طارق محمود کا کہنا ہے کہ شہر میں پانی کا لیول کم ہورہا ہے اور ہم پہلے سے اس بارے میں اطلاع دے چکے تھے۔ انہوں نے بتایا کہ لوگوں کو محفوظ مقام پر منتقل کیا جارہا ہے اور اب تک 5 ہزار لوگوں کو ریسکیو کیا جاچکا ہے، صرف 400 سے زائد لوگ پانی میں پھنسے ہوئے ہیں جنہیں جلد ریسکیو کرلیا جائے گا۔ کمشنر طارق محمود نے کہا ہے کہ ہمارے ریلیف کیمپ کام کررہے ہیں اور متاثرین کو کالج اور اسکولوں میں قائم ریلیف کیمپوں میں منتقل کیا جارہا ہے، امدادی کارروائیوں میں ڈی جی خان، مظفر گڑھ اور لیہ کی ٹیمیں حصہ لے رہی ہیں۔