کراچی میں کوروناویکسین ٹرائل کیلئے رضاکاروں سے مدد طلب، معاوضہ بھی دینےکا اعلان
31 دسمبر ، 2020
جامعہ کراچی اور انڈس اسپتال نے کورونا ویکسین کے ٹرائل کے لیے رضاکاروں سے مدد کی درخواست کردی۔
جامعہ کراچی کے بین الاقوامی مرکز برائے کیمیائی و حیاتیاتی علوم (آئی سی سی بی ایس) اور انڈس اسپتال نے کورونا ویکسین پر تحقیق کے لیے ایسے صحت مند افراد کو رضاکارانہ طور پر اپنی خدمات فراہم کرنے کی درخواست کی ہے جن کی عمریں 59 سال سے زائد ہوں۔
حکام کے مطابق رضاکاروں کا قابل معیاری ڈاکٹرز کی زیر نگرانی مکمل جسمانی معائنہ اور طبی جانچ پڑتال بلامعاوضہ کی جائے گی جن میں خون اور پیشاب کے ٹیسٹ ،ای سی جی ایکسرے اور کورونا کا پی سی آر ٹیسٹ شامل ہیں، اس کے ساتھ انہیں کورونا کی ویکسین بھی دی جائے گی۔
حکام کا کہنا ہے کہ رضاکارانہ طور پر اپنی خدمات پیش کرنے والوں کو 50 ہزار روپے معاوضہ اور دیگر اخراجات بھی دیے جائیں گے۔
