نیویارک … صدر آصف زرداری نے ہلیری کلنٹن سے ملاقات میں کہا ہے کہ گستاخانہ فلم پر پاکستانی عوام میں غم و غصہ پایا جاتا ہے، امریکا اس بات کا احساس کرے، اظہار رائے کے نام پر کسی کو عالمی امن خراب کرنے کی اجازت نہیں دی جاسکتی، پاکستان امریکا سے امداد کے بجائے تجارت کو ترجیح دیتا ہے۔ صدر آصف علی زرداری نے نیویارک میں امریکی وزیر خارجہ ہلیری کلنٹن سے ملاقات کی جس میں گستاخانہ امریکی فلم پر مذمت کا اظہار کرتے ہوئے انہیں پاکستانیوں کے جذبات سے آگاہ کیا۔ انہوں نے کہا کہ گستاخانہ فلم پر پاکستانی عوام میں شدید غم و غصہ پایا جاتا ہے، امریکا پاکستانی عوام کے غم و غصے کا احساس کرے، اظہار رائے کے نام پر کسی کو عالمی امن خراب کرنے کی اجازت نہیں دی جاسکتی۔ ان کا کہنا ہے کہ ٹیکسٹائل سمیت دیگر مصنوعات کو امریکی منڈیوں تک رسائی دی جائے، پاکستان امریکا سے امداد کے بجائے تجارت کو ترجیح دیتا ہے۔ غیر ملکی خبر ایجنسی کے مطابق امریکی وزیر خارجہ ہلیری کلنٹن نے صدر آصف علی زرداری کو میرے دوست کہہ کر مخاطب کیا اور پاکستان کیلئے نئے امرکی سفیر رچرڈ اولسن سے بھی ملوایا۔ صدر زرداری ہیلری کلنٹن ملاقات میں پاک امریکا تعلقات کے علاوہ دہشت گردی کے خلاف جنگ اور خطے کی صورت حال پر بھی تبادلہٴ خیال کیا گیا۔ ملاقات میں وزیر خارجہ حنا ربانی کھر، امریکا میں پاکستان کی سفیر شیری رحمان، سیکریٹری خارجہ جلیل عباس جیلانی، اسفند یار ولی، ڈاکٹر فاروق ستار اور مصطفی نواز کھوکھر بھی موجود تھے، ہلیری کلنٹن کے ہمراہ پاکستان کیلئے نامزد امریکی سفیر رچرڈ اولسن اور مارک گراسمین بھی ملاقات میں شریک ہوئے۔