07 جنوری ، 2022 
کراچی میں سال نو کے پہلے پولیس مقابلے میں کانسٹیبل کو قتل کرنے والا ملزم گرفتار
07 جنوری ، 2022
کراچی میں سائٹ سپر ہائی وے تھانے کی حدود میں سال نو کے پہلے پولیس مقابلے میں ایک پولیس کانسٹیبل کو قتل کرنے والے ملزم کو گرفتار کر لیا گیا ہے۔
پولیس کے مطابق یکم جنوری کی صبح فقیرا گوٹھ میں چاکر ہوٹل چاند بنگلہ کے قریب دو ملزمان نے پولیس مقابلے کے دوران پولیس کانسٹیبل برکت علی کو فائرنگ کرکے قتل جبکہ کانسٹیبل محمد انور کو شدید زخمی کردیا تھا۔
مقدمہ نمبر 02/22 زیردفعہ 353/324/302/34 اور انسداد دہشت گردی کی دفعہ 7ATA کے تحت درج کیا گیا تھا۔
ایس ایس پی ایسٹ قمر رضا جسکانی کے مطابق ڈی ایس پی سہراب گوٹھ سہیل فیض کی نگرانی میں سائیٹ سپرہائی وے کی پولیس نے ٹیکنیکل بنیاد اور خفیہ اطلاع پر کارروائی کرتے ہوئے ملزم احسان اللہ ولد لال گل کو گرفتار کیا جس کے قبضے سے ایک پستول، راؤنڈ اور چھینی گئی موٹرسائیکل برآمد ہوئی۔
ڈی ایس پی سہیل فیض کے مطابق ملزم نے ڈکیتی سمیت متعدد سنگین وارداتوں میں ملوث ہونے کا انکشاف کیا ہے۔ ملزم کے دیگر ساتھیوں کی گرفتاری کے لیے پولیس چھاپے مار رہی ہے۔
