13 مارچ ، 2022 
کراچی پولیس میں بھرتی کیلئے دوڑ کے دوران گر کر نوجوان چل بسا
13 مارچ ، 2022
کراچی پولیس میں بھرتی کے لیے دوڑ کے دوران نوجوان امیدوار عبد المجید گر کر جاں بحق ہوگیا۔
پولیس ذرائع کے مطابق کراچی میں بلدیہ ٹاؤن میں واقع پولیس ٹریننگ سینٹر میں آج پولیس اہلکاروں کی بھرتی کے سلسلے میں دوڑ ہو رہی ہے۔
پاکستان ٹیسٹنگ سروس کی رپورٹ کے مطابق 23 سالہ عبدالمجید محکمہ پولیس سندھ میں پولیس کانسٹیبل بھرتی ہونے کے لیے آج صبح 8 بجے پولیس ٹریننگ سینٹر سعید آباد پہنچا تھا، عبدالمجید کو بھرتی کی دوڑ کے لیے ساڑھے 8 بجے کا ٹائم دیا گیا تھا۔
لیاقت آباد کا رہائشی عبدالمجید دوڑ کے دوران مبینہ طور پر گر کر بے ہوش ہوگیا جسے مقامی طور پر طبی امداد دی گئی مگر اس دوران ہی وہ انتقال کر گیا۔
پولیس ذرائع کے مطابق عبدالمجید کو فوری طور پر ایدھی ایمبولینس کے ذریعے قریب ہی واقع مرشد اسپتال پہنچایا گیا تاہم ڈاکٹروں نے وہاں پہنچنے پر نوجوان کی موت کی تصدیق کر دی۔
واضح رہے کہ کراچی میں مختلف ڈسٹرکٹس، ایس ایس یو اور ٹریفک پولیس کے لیے بھرتی کا سلسلہ جاری ہے، اس سلسلے میں امیدواروں کے مختلف ٹیسٹ کیے جانے کے بعد دوڑ اور جسمانی فٹنس کا عمل بلدیہ ٹاؤن میں حب ریور روڈ پر واقع پولیس ٹریننگ سینٹر سعیدآباد میں کیا جاتا ہے۔
