نیب تحقیقات سے متعلق فرح خان کا ردعمل سامنے آگیا

نیب تحقیقات سے متعلق عمران خان کی اہلیہ بشریٰ بی بی کی قریبی دوست فرح خان عرف فرح گوگی کا بیان سامنے آگیا۔

ایک بیان میں فرح خان کا کہنا تھا کہ ہم نہ چھپیں گے، نہ ہی تحقیقات سے بچیں گے، ہم ذاتی طور پر اور اپنی قانونی ٹیم کے ذریعے نیب انکوائری ٹیم کے سامنے پیش ہوں گے۔

خیال رہے کہ قومی احتساب بیورو(نیب) نے عمران خان کی اہلیہ بشریٰ بی بی کی دوست فرح خان عرف فرح گوگی سے متعلق انکوائری کا آغاز کردیا ہے۔

نیب نے فرح خان کے اثاثوں سے متعلق انکوائری کا آغاز کردیا

انکوائری نامعلوم ذرائع آمدن اور منی لانڈرنگ کے الزامات پر کی جائےگی، فرح خان کے اکاؤنٹ میں گزشتہ 3 سال میں 847 ملین روپے ملے، اعلامیہ نیب

نیب کی جانب سے جاری اعلامیےکے مطابق انکوائری نامعلوم ذرائع آمدن اور منی لانڈرنگ کے الزامات پر کی جائےگی، ڈی جی نیب لاہور کو قانون کے مطابق کارروائی کا حکم دے دیا گیا ہے۔

اعلامیےکے مطابق فرح خان پر مختلف کاروبار کے نام پر بہت سے بینک اکاؤنٹس رکھنے کا الزام بھی ہے، فرح خان کے اکاؤنٹ میں گزشتہ 3 سال میں 847 ملین روپے ملے ہیں۔

نیب کا کہنا ہےکہ اتنی رقم فرح خان کے پروفائل کے مطابق نہیں ہے، یہ رقوم فرح خان کے ذاتی اکاؤنٹ میں ڈالی گئیں اور فوری نکال لی گئیں، میڈیا رپورٹس میں فرح خان پر غیر قانونی ذرائع سے اثاثے بنانے کے الزامات لگائے گئے تھے۔

نیب اعلامیے میں کہا گیا ہےکہ فرح خان کے انکم ٹیکس ریٹرنز میں ان کے اثاثے 2018 سے غیر معمولی طور پر بڑھے، اسی دوران فرح خان 9 بار امریکا اور 6 بار یو اے ای بھی گئیں۔

خیال رہےکہ سال 2018 میں ہی عمران خان اقتدار میں آئے تھے اور اسی سال عثمان بزدار وزیراعلیٰ پنجاب کے منصب پر فائز ہوئے تھے، ذرائع کا کہنا ہےکہ عثمان بزدار کی تعیناتی میں فرح خان کا اہم کردار تھا۔

خیال رہےکہ سابق خاتون اول بشریٰ بی بی کی دوست فرح خان رواں ماہ کے آغاز میں دبئی روانہ ہوگئی تھیں۔

ن لیگ اور پیپلز پارٹی کے رہنماؤں نے فرح خان پر ٹرانسفر، پوسٹنگ اور دیگر معاملات میں پیسے لینے کا الزام لگایا ہے۔