05 جون ، 2022 
ملا یعقوب افغان فوجیوں کو تربیت کیلئے بھارت بھیجنے پر رضامند
05 جون ، 2022
افغان طالبان کے سابق امیر ملا عمر کے صاحبزادے اور امارت اسلامی افغانستان کے وزیر دفاع ملا یعقوب نے افغان فوجیوں کو تربیت کے لیے بھارت بھیجنے پر آمادگی ظاہر کی ہے۔
ایک بھارتی چینل کو دیے گئے انٹرویو میں ملا عمر سے سوال کیا گیا کہ کیا وہ افغان فوجیوں کو تربیت کے لیے بھارت بھیجنے پر آمادہ ہیں؟ جس پر انھوں نےکہا کہ ہمیں افغان فورسز کو تربیت کے لیے بھارت بھیجنے میں کوئی مسئلہ نہیں ہے، اس سے دونوں ممالک کے درمیان تعلقات مضبوط ہوں گے اور ہم اس کی بنیاد رکھیں گے۔
بھارت سے سفارتی تعلقات سے متعلق کیے جانے والے سوال پر ملا یعقوب کا کہنا تھا کہ افغانستان بھارت سمیت تمام ممالک سے مضبوط سفارتی تعلقات رکھنے کا خواہشمند ہے، ہمارے جب تمام ممالک سے سیاسی اور سفارتی تعلقات مضبوط ہوں گے ہم تب ہی دفاعی تعلقات کے لیے تیار ہو سکیں گے، ہمیں اس میں کوئی مسئلہ نظر نہیں آتا۔
افغان وزیر دفاع نے دوران گفتگو بھارت سے کابل میں اپنا بند سفارت خانہ دوبارہ کھولنے کی درخواست کرنے کے ساتھ طالبان سفیر کو نئی دہلی میں افغان سفارت خانہ سنبھالنے کی اجازت دینے کا بھی مطالبہ کیا۔
انھون نے مزید کہا کہ اگر بھارت اپنے سفارتی عملے کو افغانستان واپس بھیجتا ہے تو طالبان کسی بھی قسم کی حفاظتی ضمانت دینے کے لیے تیار ہیں۔
یاد رہے کہ افغانستان سے امریکی انخلا اور طالبان کے حکومت میں آنے کے بعد پہلی بار بھارتی وفد طالبان حکومت سے ملاقات کے لیے افغانستان پہنچا ہے۔
