پاکستان اور افغانستان کے درمیان وارم اپ میچ بارش کےباعث ختم کردیاگیا

 ٹی ٹوئنٹی ورلڈکپ کے وارم اپ میچ میں   پاکستان اور افغانستان کا میچ بارش کے باعث ختم کردیا گیا۔

155 رنز کے تعاقب میں پاکستان نے اپنی اننگز میں 2.2 اوورز میں  19 رنز بنائےتھے  جس کے بعد بارش  کے باعث میچ روک دیا گیا جو دوبارہ شروع نہ ہوسکا جس کے باعث امپائر کو میچ ختم کرنا پڑا۔

افغانستان کی اننگز

برسبین میں کھیلے جارہے میچ میں افغانستان  نےمقررہ اوورز میں6 وکٹ کے نقصان پر 154 رنز بنائے۔

 وارم اپ میچ میں قومی ٹیم کی جانب سے  شاہین شاہ آفریدی  نے افغانستان کے خلاف شاندار بولنگ کا آغاز کیا  اور شروعات میں ہی افغانستان کی 2 وکٹ حاصل کرنے میں کامیاب ہوگئے۔

  شاہین شاہ نے  افغان کرکٹر  رحمان اللہ گرباز کوپہلے اوور میں ایل بی ڈبلیو کیا ، جس کے بعد شاہین حضرت اللہ زازئی  کو صرف 9 ہی  رنز پر پویلین بھیجنے میں کامیاب ہوگئے۔

  افغانستان کی تیسری وکٹ فاسٹ بولر حارث رؤف لینے میں کامیاب ہوگئے ،افغان بیٹر دروش  7 رنز پر حارث کی گیند پر  محمد نواز کو کیچ دے بیٹھے جس کے بعد  افغانستان کی چوتھی وکٹ محمد نواز  نے لی اور نجیب اللہ کو 6 رنز پر واپسی کی راہ دکھائی جس کے بعد حارث روف اور نائب کپتان شاداب خان نے بھی ایک ایک وکٹ لی۔

افغانستان کی جانب سے  کپتان محمد نبی 37 گیندوں پر 51  اور عثمان غنی نے 20 گیندوں پر 32 رنز بنانے میں کامیاب رہے۔ 

قومی اسکواڈ

قومی ٹیم کی قیادت بابر اعظم کررہے ہیں جبکہ افغانستان ٹیم کی قیادت محمد نبی کررہے ہیں۔

دیگر کھلاڑیوں میں محمد رضوان، شان مسعود، حیدر علی، افتخار احمد، خوشدل شاہ، محمد نواز، شاداب خان، آصف علی، محمد وسیم، حارث رؤف، شاہین آفریدی، نسیم شاہ اور محمد حسنین شامل ہیں۔

وارم اپ میچ میں فخر زمان کے علاوہ تمام کھلاڑی حصہ لیں گے، فخر زمان ری ہیب میں شامل اپنی ٹریننگ کا سلسلہ جاری رکھیں گے ۔