24 اکتوبر ، 2022 
آڈیو لیکس کی تحقیقات کیلئے عمران خان کی درخواست اعتراضات کے ساتھ واپس
24 اکتوبر ، 2022
آڈیو لیکس کی تحقیقات کے لیے چیئرمین تحریک انصاف عمران خان کی جانب سے سپریم کورٹ میں دائر درخواست پر اعتراضات عائد ہو گئے۔
سپریم کورٹ رجسٹرار آفس نے عمران خان کی درخواست اعتراضات لگا کر واپس کر دی۔
رجسٹرار آفس کی جانب سے لگائے گئے اعتراض میں کہا گیا ہے کہ درخواست گزار عمران خان نے متعلقہ فورم سے رجوع نہیں کیا، درخواست میں بنیادی حقوق سے متعلق معاملے کی وضاحت نہیں کی گئی۔
عمران خان کی درخواست پر یہ اعترٓض بھی عائد کیا گیا ہے کہ واضح نہیں کیا گیا کہ آڈیولیکس معاملے پر آرٹیکل 184/3 کا اطلاق کیسے ہوتا ہے۔
یاد رہے کہ چیئرمین تحریک انصاف عمران خان نے آڈیو لیکس کی تحقیقات کے لیے سپریم کورٹ میں درخواست دائر کر کے معاملے کی تحقیقات کے لیے جوڈیشل کمیشن یا جے آئی ٹی بنانے کا مطالبہ کیا تھا۔
