13 جنوری ، 2023 
پنجاب میں اعتماد کے ووٹ کے دوران نواز شریف نے 3 بار رانا ثنا کو فون کیا، کیا گفتگو ہوئی؟
13 جنوری ، 2023
پنجاب اسمبلی میں اعتماد کے ووٹ کے معاملے پر مسلم لیگ ن کے قائد نواز شریف نے ن لیگ پنجاب کے صدر رانا ثنا اللہ کو اس معاملے پر تین بار فون کیا۔
ذرائع کے مطابق اعتماد کے ووٹ سے پہلے اور بعد میں نواز شریف نے رانا ثنا اللہ کو تین بار فون کیا۔
نواز شریف کے قریبی ذرائع کا کہنا ہے کہ پارٹی قائد کا رانا ثنا اللہ کو کہنا تھا پنجاب کی پارلیمانی کمیٹی کو ذمہ داری کا مظاہرہ کرنا چاہیے تھا، ذمہ داری لینے والوں کو کچا کام نہیں کرنا چاہیے تھا۔
ذرائع کے مطابق رانا ثنا اللہ کا کہنا تھا پارلیمانی کمیٹی کے ارکان کی یقین دہانی پر ہم نے مؤقف تبدیل کیا، پارٹی تو اپنے مؤقف پر قائم تھی کہ اسمبلی ٹوٹنے دیں۔
یاد رہے کہ دو روز قبل وزیراعلیٰ پنجاب چوہدری پرویز الٰہی نے ایوان سے اعتماد کا ووٹ لیا تھا جس کے بعد گورنر پنجاب محمد بلیغ الرحمان نے پرویز الٰہی کو معطل کرنے کا نوٹیفکیشن واپس لے لیا تھا۔
