27 جنوری ، 2023 
مبینہ بیٹی ظاہر نہ کرنے پر عمران کیخلاف نااہلی کیس کی سماعت بغیر کارروائی ملتوی
27 جنوری ، 2023
اسلام آباد ہائیکورٹ نے مبینہ بیٹی ظاہر نہ کرنے پر چیئرمین پی ٹی آئی عمران خان کے خلاف نااہلی کیس کی سماعت بغیر کارروائی 2 فروری تک ملتوی کر دی۔
چیف جسٹس عامر فاروق نے عمران خان نااہلی کیس کی سماعت کی۔ عمران خان کے وکیل سلمان اکرم راجہ عدالت میں پیش نہ ہوئے اور ناسازی طبیعت کے باعث التوا کی درخواست جمع کرائی جسے عدالت نے منظور کر لیا۔
التوا کی درخواست میں مؤقف اختیار کیا گیا تھا کہ 19 جنوری کی سماعت کے بعد صحت خراب ہوئی، 24 جنوری کو میڈیکل چیک اپ ہوا، طبعیت خرابی کے باعث ڈاکٹر نے ریسٹ تجویز کیا ہے۔
درخواست میں کہا گیا ہے کہ صحت ٹھیک نا ہونے کی وجہ سے عمران خان سے ملاقات بھی نہیں ہوئی، اسی وجہ سے درخواست قابل سماعت ہونے پر اعتراضات داخل نہیں کر سکا، کیس کم سے کم ایک ہفتے کے لیے ملتوی کیا جائے تاکہ عدالت کی معاونت کر سکوں۔
چیف جسٹس نے ریمارکس دیے کہ مجھے پتہ چلا سلمان اکرم راجہ کا دانت ٹوٹ گیا ہے، بتائیں کہ راجہ صاحب کو کس نے مکا مارا ہے جو دانت کریک ہو گیا، میں مجرم کو ڈھونڈ رہا ہوں۔
عدالت نے کیس کی مزید سماعت 2 فروری تک ملتوی کردی۔
