پیپلز پارٹی مطالبات ماننے کو تیار، ایم کیو ایم پاکستان کا دھرنا مؤخر کرنے پر غور
11 فروری ، 2023
پیپلز پارٹی کی جانب سے مطالبات تسلیم کرنے کی یقین دہانی کے بعد ایم کیو ایم پاکستان نے کل کا دھرنا مؤخر کرنے پر غور شروع کر دیا۔
ایم کیو ایم پاکستان کے کنوینر خالد مقبول صدیقی کا کہنا ہے کہ نیوی کی امن مشقوں کے پیش نظر فیصلے پر نظرثانی کی جا سکتی ہے تاہم حتمی فیصلہ گورنر سندھ کامران ٹیسوری سے ملاقات کے بعد کیا جائے گا۔
خالد مقبول صدیقی نے کہا کہ پیپلز پارٹی نے ایم کیو ایم کے مطالبات تسلیم کرنے کی یقین دہانی کرائی ہے، عملی اقدامات پر دھرنا ختم کیا جائےگا۔
یاد رہے کہ ایم کیو ایم پاکستان نے 12 فروری سے گورنر ہاؤس کے سامنے فوارہ چوک پر دھرنے کا اعلان کر رکھا ہے۔
گزشتہ روز بھی پیپلز پارٹی کے وفد نے ایم کیو ایم کے رہنماؤں سے ملاقات کر کے دھرنا مؤخر کرنے کے حوالے سے بات چیت کی تھی۔
