12 اپریل ، 2023 
پاک نیوزی لینڈ سیریز: بیٹنگ کمپنی کے اسپانسر کا معاملہ قائمہ کمیٹی میں پہنچ گیا
12 اپریل ، 2023
پاکستان کرکٹ بورڈ کی جانب سے نیوزی لینڈ کے خلاف سیریز کے لیے بیٹنگ کمپنی کو دوباہ اسپانسرز دینے کا معاملہ قومی اسمبلی کی قائمہ کمیٹی برائے بین الصوبائی رابطہ میں پہنچ گیا۔
چیئرمین نواب شیر وسیر کی زیر صدارت قومی اسمبلی کی قائمہ کمیٹی برائے بین الصوبائی رابطہ کا اجلاس ہوا جس میں پاکستان کرکٹ بورڈ (پی سی بی) کا بیٹنگ کمپنی کو دوباہ ہاٸر کرنے کا معاملہ بھی اٹھایا گیا۔
کمیٹی رکن شاہد رحمانی کا کہنا تھا نیوزی لینڈ کے خلاف سیریز میں بیٹنگ کمپنی کو اسپانسرشپ دے دی گئی ہے، یہ بہت سنجیدہ معاملہ ہے۔
شاہد رحمانی کا کہنا تھا پی ایس ایل میں بھی اس معاملے کو اٹھایا گیا تھا، مشکوک کمپنی کو شراکت دار بنانے سے ملک کی بدنامی ہو گی۔
انہوں نے کہا کہ پی سی بی نے کمیٹی اجلاس میں انکوائری کرنے کا وعدہ کیا تھا، پی سی بی نے انکواٸری کرنے کے بجائے دوبارہ اسپانسرشپ دے دی۔
یاد رہے کہ پاکستان سپر لیگ کے دوران بھی اسٹیٹ بینک کی جانب سے سٹے کے برانڈ کی تشہیر پر تشویش کا اظہار کرتے ہوئے اسے قومی قوانین کے منافی قرار دیا گیا تھا۔
