24 جولائی ، 2023 
گورنر خیبر پختونخوا نے نگران وزیر ٹرانسپورٹ کو کابینہ سے ہٹانے کی سمریاں واپس بھیج دیں
24 جولائی ، 2023
گورنر خیبر پختونخوا غلام علی نے نگران وزیر ٹرانسپورٹ شاہد خٹک کو کابینہ سے ہٹانے کی نگران وزیراعلیٰ کی دو سمریاں واپس بھیج دیں۔
ذرائع کے مطابق نگران وزیراعلیٰ اعظم خان نے صوبائی وزیر شاہد خٹک کو کابینہ سے ہٹانے کی دو سمریاں گورنر غلام علی کو بھیجیں، ایک سمری الیکشن کمیشن کے حکم کے مطابق کابینہ سے ہٹانے کے حوالے سے تھی جب کہ دوسری سمری شاہد خٹک کے استعفیٰ کو قبول کرنے سے متعلق تھی۔
ذرائع کے مطابق گورنر نے وزیراعلیٰ کو ایک سمری بھیجنے کی درخواست کی ہے۔ الیکشن کمیشن نے وزیراعلیٰ کو نگران وزیر شاہد خٹک کو سیاسی جلسے میں شرکت کرنے پر کابینہ سے ہٹانے کا حکم دیا تھا۔
دوسری جانب نگران وزیر شاہد خٹک نے وزیراعلیٰ محمد اعظم خان کو اپنا استعفا بھی ارسال کیا تھا۔
