07 اگست ، 2023 
بیرون ملک حملے جہاد نہیں جنگ ہو گی: ہیبت اللہ اخوندزادہ کا طالبان کو پیغام
07 اگست ، 2023
طالبان کے سپریم لیڈر ہیبت اللہ اخوندزادہ نے واضح کیا ہے کہ طالبان کی جانب سے بیرون ملک حملے کیے گئے تو وہ جہاد نہیں بلکہ جنگ ہو گی۔
غیر ملکی خبر رساں ایجنسی کے مطابق افغانستان کے وزیر دفاع محمد یعقوب مجاہد نے سرکاری ٹیلی ویژن سے نشر ہونے والی افغان سکیورٹی فورسز کے ارکان سے ایک تقریر میں کہا کہ افغانستان سے باہر لڑائی مذہبی طور پر منظور شدہ جہاد نہیں بلکہ جنگ ہے جسے سپریم لیڈر ہیبت اللہ اخوندزادہ نے روک دیا ہے۔
محمد یعقوب مجاہد کے مطابق سپریم لیڈر ہیبت اللہ اخوندزادہ نے کہا کہ اگر کوئی جہاد کے مقصد کے لیے افغانستان سے باہر جاتا ہے تو اسے جہاد نہیں کہا جائے گا۔
وزیر دفاع نے کہا کہ اگر امیر المجاہدین جنگجوؤں کو جنگ میں جانے سے روکتے ہیں اور وہ پھر بھی ایسا کرتے ہیں تو یہ جنگ ہے، جہاد نہیں۔
یاد رہے کہ حالیہ کچھ ماہ کے دوران پاکستان میں افغان سرزمین سے متعدد حملے کیے گئے جس پر پاکستان کی جانب سے افغان حکام پر زور بھی دیا گیا کہ افغان سرزمین کو پاکستان کے خلاف دہشتگردی کے لیے استعمال ہونے سے روکا جائے جس پر افغان حکام کی جانب سے بھی بار ہا یقین دہانی کرائی گئی کہ اپنی سرزمین پاکستان یا کسی بھی اور ملک کے خلاف استعمال نہیں ہونے دیں گے۔
