28 ستمبر ، 2023 
چیف جسٹس کیس کے دلائل نہ دینے پر سپریم کورٹ کے سینئر وکیل پر برہم
28 ستمبر ، 2023
چیف جسٹس پاکستان قاضی فائز عیسیٰ نے کیس سے متعلق دلائل نہ دینے پر سپریم کورٹ کے سینئر وکیل پر برہمی کا اظہار کیا۔
سپریم کورٹ میں ٹیکس سے متعلق کیس کی سماعت چیف جسٹس پاکستان قاضی فائز عیسیٰ کی سربراہی میں ہوئی۔
چیف جسٹس پاکستان نے دلائل نہ دینے پر برہمی کا اظہار کرتے ہوئے وکیل فیاض شیرازی سے مکالمے میں کہا کیس کے میرٹ پر دلائل دیں، بتائیں آپ کی درخواست قابل سماعت ہے؟
وکیل فیاض شیرازی نے کہا ہمارا کیس زائد المعیاد ہے، جس پر چیف جسٹس پاکستان نے کہا کہ عدالت آپ کا کیس سننا چاہتی ہے اور آپ کہہ رہے ہیں کیس زائد المعیاد ہے، آپ کلرک نہیں سپریم کورٹ کے سینیئر وکیل ہیں۔
جسٹس قاضی فائز عیسیٰ نے مزید کہا آپ کا بڑا احترام ہےکیونکہ آپ سینئر وکیل ہیں اور آپ کا بڑا مرتبہ ہے۔
چیف جسٹس پاکستان نے دلائل نہ دینے پر نظرثانی درخواست مسترد کر دی۔
