کوئٹہ …ڈی آئی جی کوئٹہ حامد شکیل کے اعلامیہ کے مطابق علمدارروڈپر2دھماکوں میں جاں بحق افراد کی تعداد81 ہو گئی ہے،جبکہ دھماکوں میں 121افراد زخمی ہوئے، ہلاک شدگان میں ایک ڈی ایس پی اور ایک ایس ایچ او بھی شامل ہیں۔ اسپتال ذرائع کے مطابق زخمیوں میں شدید زخمی بھی شامل ہیں جن کی حالت تشویش ناک ہے۔ پہلے دھماکے کی اطلاع پرپہنچنے والی میڈیاٹیم دوسرے دھماکے کی زدمیں آگئی اور نجی ٹی وی کے کیمرا مین عمران شیخ جاں بحق ہوگئے جبکہ سیٹ لائٹ انجینئربھی زخمی ہو ئے۔ واقعے میں جیو ٹی وی کی او بی وین بھی شدید متاثر ہو ئی اور اس کی ونڈ اسکرین مکمل طور پر ٹوٹ گئی اور اندر بیٹھے ایک کیمرہ مین بھی زخمی ہو گئے۔ پہلا دھماکا کوئٹہ کی اہم اور مصروف شاہراہ علم دارروڈکے قریب رحمت اللہ چوک پرہواجس کی کوریج کے لئے جوں ہی میڈیاٹیم پہنچی دوسرا دھماکا ہو گیا اور میڈیا ٹیم دھماکے کی زدمیں آگئی۔علمدارروڈپرپہنچنے والی میڈیاٹیم کے کئی نمائند ے دوسرے دھماکے میں ہی زخمی ہوئے۔بتایا جاتا ہے کہ پہلا دھماکا خود کش تھا۔ دوسری طرف سی سی پی او کوئٹہ میر زبیر نے پریس کانفرنس کرتے ہوئے کہا ہے کہ دھماکوں میں ڈی ایس پی اورایس ایچ اوسمیت9اہلکارجاں بحق ہوئے، دھماکوں میں جاں بحق ہونے والوں میں سے 62افراد کی لاشیں سی ایم ایچ،10 سول اسپتال اور9 دیگر اسپتال منتقل کی گئی ہیں۔ میر زبیر کے مطابق متعددزخمیوں کی حالت تشویشناک ہے، جس کے باعث ہلاکتوں میں اضافے کاخدشہ ہے، جبکہ دھماکوں کی جگہ امدادی کارروائیاں جاری ہیں۔