10 اکتوبر ، 2023
آئی سی سی کرکٹ ورلڈکپ میں جہاں ایک طرف آسٹریلیا کے خلاف بھارت کے ویرات کوہلی کی اننگز کے چرچے ہیں وہیں دوسری طرف کوہلی کے ہمشکل کی تصاویر اور ویڈیوز بھی سوشل میڈیا پر گردش کررہی ہیں۔
بھارتی میڈیا کے مطابق ویرات کوہلی کے ہم شکل کارتک شرما کا تعلق بھارت کے شہر چندی گڑھ سے ہے جب کہ وہ پیشے کے اعتبار سے سوفٹ ویئر انجینئر ہیں۔
کارتک کے چہرے کے خدوخال کو دیکھیں تو وہ ویرات کوہلی سے مشابہت رکھتے ہیں اور ان کی داڑھی کا اسٹائل بھی کرکٹر سے ملتا جلتا ہے۔
کارتک کے انسٹاگرام اکاؤنٹ کو وزٹ کیا جائے تو اندازہ ہوتا ہے کہ وہ خود بھی ویرات کوہلی سے خاصے متاثر ہیں، یہی وجہ ہے کہ ان کے اکاؤنٹ پر کرکٹ کھیلنے کی بھی کئی ویڈیوز موجود ہیں ۔
کارتک کی ایک ویڈیو میں انہوں نے بتایا کہ وہ کہیں بھی جائیں تو لوگ انہیں ویرات کوہلی سمجھ کر ان کے ساتھ تصویریں بنوانے لگتے ہیں لیکن وہ کرکٹ کا جنون رکھنے کے ساتھ ساتھ ویرات کوہلی کی ہی طرح دکھتے ہیں۔
کارتک نے کہا کہ ان کی خواہش ہے وہ ویرات سے مل کر انہیں بتائیں کہ وہ ان کے کتنے بڑے فین ہیں۔