19 نومبر ، 2023 
الیکشن جیتنے کیلئے کانگریس رہنما کی بھکاری سے ’چپل مار آشیرواد‘ کی ویڈیو وائرل
19 نومبر ، 2023
بھارتی ریاست مدھیہ پردیش کی اسمبلی کے الیکشن جیتنے کیلئے کانگریس رہنما پارس سکلیچہ نے بھکاری سے چل مار آشیرواد لیا جس کی ویڈیو سوشل میڈیا پر وائرل ہو گئی۔
بھارتی میڈیا کے مطابق مدھیہ پردیش کے شہر رتلام سے کانگریس رہنما پارس سکلیچہ نے اسمبلی کے انتخابات میں حصہ لیا جس کیلئے پولنگ تو ختم ہو چکی ہے لیکن ان کے حوالے سوشل میڈیا پر ایک ویڈیو زیر گردش ہے۔
بتایا جارہا ہے کہ پارس سکلیچہ نے 2013 اور 2018 میں بھی اسمبلی کے الیکشن میں حصہ لیا تھا لیکن انہیں ناکامی کا سامنا کرنا پڑا تھا، اسی وجہ سے کانگریس رہنما اس بار الیکشن میں لڑنے کیلئے ایک بھکاری بابا کے پاس چپل مار آشیرواد لینے پہنچ گئے۔
ویڈیو میں دیکھا جاسکتا ہے کہ ایک عمر رسیدہ بھکاری سڑک کنارے موجود ہے اور کانگریس رہنما ان کیلئے نئی چپل کا جوڑا لاتے ہیں جس سے بھکاری بابا انہیں کئی بار چپل مار کر آشیرواد دیتے ہیں۔
ویڈیو میں دیکھا جاسکتا ہے کہ بھکاری بابا کبھی کانگریس رہنما کے سر پر تو کبھی ان کے منہ پر چپل مار رہے ہیں۔
بھارتی میڈیا کے مطابق بھکاری بابا چپل مار کر آشیرواد دیتے ہیں جس کا مطلب ہے کہ چپل کھانے والے شخص سے نظر بد ختم ہو جاتی ہے اور اس کے کام بن جاتے ہیں۔
بھارتی میڈیا کے مطابق مدھیہ پردیش میں اسمبلی کے الیکشن جمعے کے روز ہوئے تھے جس میں ٹرن آؤٹ 76.22 فیصد رہا جسے ریاست کی تاریخ کا سب سے بڑا ٹرن آؤٹ کہا جارہا ہے، ووٹوں کی گنتی کا عمل 3 دسمبر تک جاری رہے گا۔
