13 جنوری ، 2024 
خواہش کے باوجود پی ٹی آئی نے سینئر نائب صدر شیر افضل کو مطلوبہ ٹکٹ کیوں نہ دیا؟
13 جنوری ، 2024
پاکستان تحریک انصاف نے پارٹی کے سینئر نائب صدر شیر افضل مروت کو ان کی خواہش کے باوجود پشاور سے قومی اسمبلی کے حلقے کے لیے ٹکٹ جاری نہ کیا۔
شیر افضل مروت نے پشاور سے قومی اسمبلی کے حلقہ این اے 32 کیلئے کاغذات نامزدگی جمع کرائے تھے لیکن گزشتہ روز پی ٹی آئی نے پارٹی امیدواروں کا اعلان کیا جس میں شیر افضل کو پشاور سے ٹکٹ جاری نہیں کیا گیا۔
ترجمان پی ٹی آئی کا کہنا ہے کہ شیر افضل مروت کو این اے 32 پشاورکا ٹکٹ نہیں دیا گیا، حلقہ این اے 32 پشاور سے آصف خان پی ٹی آئی کے امیدوار ہوں گے۔
پارٹی ذرائع کے مطابق شیر افضل مروت این اے 32 پشاور سے الیکشن لڑنے کے خواہش مند تھے تاہم پی ٹی آئی کی صوبائی قیادت شیر افضل مروت کے پشاور سے الیکشن لڑنے پر رضامند نہیں تھی اس لیے انہیں ٹکٹ بھی نہ مل سکا۔
اس حوالے سے شیر افضل مروت کا کہنا ہے مجھے آبائی حلقے این اے 41 لکی مروت کا ٹکٹ دیا گیا ہے، مجھے انتخابی معرکے میں کوئی دلچسپی نہیں تھی، بانی پی ٹی آئی عمران خان نے مجھ پر اور لکی مروت کے لوگوں پر اعتماد کیا ہے۔
خیال رہے کہ این اے 32 پشاور سے اے این پی کے رہنما غلام احمد بلور بھی الیکشن لڑ رہے ہیں اور ان کا مقابلہ پی ٹی آئی کے آصف خان سے ہو گا۔
