جسمانی وزن میں کمی لانے کے لیے 11 بہترین پھل

ویب ڈیسک

08 مارچ ، 2024

موٹاپا دنیا بھر میں وبا کی طرح پھیل رہا ہے / فائل فوٹو

موٹاپا دنیا بھر میں وبا کی طرح پھیل رہا ہے جو متعدد دائمی امراض بشمول ذیابیطس، کینسر اور دیگر کا خطرہ بھی بڑھاتا ہے۔

درحقیقت دنیا بھر میں جوان افراد میں موٹاپا عام ہوتا جا رہا ہے۔

طبی سائنس میں موٹاپے کو دائمی عارضہ تصور کیا جاتا ہے جس کا علاج ممکن ہے۔

اچھی خبر یہ ہے کہ چند پھلوں کے استعمال سے جسمانی وزن میں کمی لانے میں مدد ملتی ہے۔

ایسے ہی پھلوں کے بارے میں جانیں جو موٹاپے سے نجات میں مددگار ثابت ہو سکتے ہیں۔

سیب

سیب میں فائبر اور پانی کی مقدار کافی زیادہ ہوتی ہے جس سے پیٹ بھرنے کا احساس زیادہ دیر تک برقرار رہتا ہے۔

ایک تحقیق میں دریافت کیا گیا کہ سیب کھانے سے بھوک لگنے کا احساس زیادہ دیر سے ہوتا ہے جبکہ اس پھل سے جسمانی وزن میں کمی بھی آتی ہے۔

سیبوں میں موجود پولی فینولز اینٹی آکسائیڈنٹس سے بھی جسمانی وزن کو بڑھنے سے روکنا ممکن ہوتا ہے۔

بلیو بیری

بلیو بیری وہ پھل ہے جس میں کیلوریز بہت کم ہوتی ہیں۔

ایک کپ بلیو بیریز میں محض 85 کیلوریز ہوتی ہیں اور اس کے ساتھ ساتھ اس پھل میں اینٹی آکسائیڈنٹس کی مقدار بہت زیادہ ہوتی ہے جس سے امراض قلب کا خطرہ کم ہوتا ہے۔

ایک تحقیق میں دریافت کیا گیا کہ بلیو بیریز کھانے کے عادی افراد کے جسمانی وزن میں اضافہ بہت سست روی سے ہوتا ہے۔

اس پھل میں موجود Anthocyanin نامی اینٹی آکسائیڈنٹس جسمانی وزن میں کمی لانے میں مدد فراہم کرتے ہیں۔

کھجور

کھجور کھانے کی عادت بھی موٹاپے سے نجات دلانے میں مددگار ثابت ہو سکتی ہے۔

ایک تحقیق میں دریافت کیا گیا کہ روزانہ 3 کھجوریں کھانے والے افراد کے جسمانی وزن میں کمی آتی ہے جبکہ کولیسٹرول کی سطح بھی بہتر ہو جاتی ہے۔

کھجور میں قدرتی مٹھاس کافی زیادہ ہوتی ہے تو اس پھل کو چینی کے متبادل کے طور پر بھی استعمال کیا جا سکتا ہے۔

گریپ فروٹ

گریپ فروٹ کھانے سے بھی جسمانی وزن میں کمی لانے میں مدد ملتی ہے۔

ایک تحقیق میں دریافت کیا گیا کہ دن یا رات کو کھانے سے قبل آدھا گریپ فروٹ کھانے سے 12 ہفتوں میں جسمانی وزن میں 2 کلو کے قریب کمی آتی ہے۔

البتہ گریپ فروٹ کے جوس سے یہ فائدہ نہیں ہوتا اور اگر آپ ادویات استعمال کر رہے ہیں تو اس پھل کو ڈاکٹر کے مشورے سے ہی استعمال کریں۔

آم

آم کو پھلوں کا بادشاہ بھی کہا جاتا ہے کیونکہ اس کا ذائقہ ایسا ہوتا ہے کہ جتنا بھی کھا لیں دل نہیں بھرتا۔

زیادہ اچھی بات یہ ہے کہ اسے کھانے سے جسمانی وزن میں کمی لانے میں بھی مدد مل سکتی ہے۔

ایک تحقیق میں دریافت کیا گیا کہ آم کھانے کے عادی افراد کا جسمانی وزن کم ہوتا ہے جبکہ پیٹ اور کمر کے گرد چربی کی سطح میں اضافہ نہیں ہوتا۔

اس کے ساتھ ساتھ آم کھانے سے جسم کو فائبر، میگنیشم، پوٹاشیم، فولیٹ، وٹامن اے، سی اور ای جیسے اجزا بھی ملتے ہیں۔

مالٹے

ایک مالٹے میں 3 گرام غذائی فائبر موجود ہوتا ہے۔

فائبر سے نہ صرف قبض سے بچنے یا اس سے ریلیف میں مدد ملتی ہے بلکہ یہ غذائی جز آنتوں کو بھی صحت مند رکھتا ہے۔

اسی طرح فائبر سے کولیسٹرول اور بلڈ شوگر کی سطح بھی کم ہوتی ہے۔

مالٹوں میں موجود فائبر سے پیٹ بھرنے کا احساس زیادہ دیر تک برقرار رہتا ہے جس سے جسمانی وزن کو کنٹرول کرنا بھی آسان ہوجاتا ہے۔

انار

انار میں بھی فائبر کی مقدار کافی زیادہ ہوتی ہے جبکہ ایسے اینٹی آکسائیڈنٹس موجود ہوتے ہیں جو جسمانی ورم میں کمی لانے میں مدد فراہم کرتے ہیں۔

تحقیقی رپورٹس سے ثابت ہوا ہے کہ انار میں موجود اینٹی آکسائیڈنٹس جسمانی وزن میں کمی لانے کے لیے بہترین ہوتے ہیں، کیونکہ وہ چربی کو گھلانے کا عمل تیز کرتے ہیں جبکہ معدے کی صحت بہتر ہوتی ہے۔

اسٹرا بیری

اسٹرا بیری بھی جسمانی وزن میں کمی لانے کے لیے بہترین پھل ہے۔

اس کی وجہ یہ ہے کہ اس میں فائبر اور اینٹی آکسائیڈنٹس کی مقدار کافی زیادہ ہوتی ہے جبکہ کیلوریز بہت کم۔

اسٹرا بیریز کو کھانے سے امراض قلب، ذیابیطس اور موٹاپے سمیت دیگر متعدد امراض سے تحفظ ملتا ہے۔

تربوز

تربوز وہ پھل ہے جس کے سرخ رنگ کو دیکھتے ہی فرحت کا احساس ہوتا ہے۔

سرخ رنگ کے پھل کے بارے میں مانا جاتا ہے کہ اسے کھانے سے متعدد امراض سے تحفظ ملتا ہے۔

اس میں موجود پانی، اینٹی آکسائیڈنٹس، غذائی اجزا اور فائبر سے جسمانی وزن میں صحت مند کمی آتی ہے۔

ایک تحقیق میں دریافت کیا گیا کہ روزانہ تربوز کھانے سے جسمانی وزن میں کمی کا عمل تیز ہو جاتا ہے کیونکہ پیٹ بھرنے کا احساس زیادہ دیر تک برقرار رہتا ہے اور بھوک کم لگتی ہے، جس سے بے وقت کھانے کی خواہش کم ہوتی ہے۔