کراچی....کراچی میں فائرنگ کے واقعات میں آج رات تاجر رہنما اور ایک سیاسی جماعت کا کارکن قتل کردیے گئے۔ تاجربرادری نے تاجر رہنما کے قتل کے خلاف آج شہر بھر میں کاروبار بند رکھنے کا اعلان کیا ہے۔کراچی میں فائرنگ سے زخمی ہونے والے تاجر رہنما محمد عرفان 3دن تک زندگی اور موت کی کشمکش میں مبتلا رہنے کے بعد انتقال کرگئے۔ ان کے قتل پر تاجروں نے آج کاروبار بند رکھنے کا اعلان کیا ہے۔تشدد کے دیگر واقعات میں سیا سی جماعت کا ایک کارکن بھی قتل کر دیا گیا ۔واضح رہے کہ کراچی الیکٹرونکس مارکیٹ کے سابق چیئرمین محمد عرفان 24 جنوری کو نارتھ ناظم آباد میں فائرنگ سے زخمی ہوگئے تھے۔ انہیں اسٹیڈیم روڈ پر واقع نجی اسپتال میں داخل کرایا گیا تھا جہاں رات گئے انہوں نے دم توڑ دیا۔ محمد عرفان کی نماز جنازہ بعد نماز ظہر نارتھ ناظم آباد بلاک ڈی کی مسجد طیبہ میں ادا کی جائے گی اور تدفین پاپوش نگر قبرستان میں ہوگی۔ چیئرمین سندھ تاجر اتحاد جمیل پراچہ نے محمد عرفان کے قتل کی شدید مذمت کرتے ہوئے آج تمام مارکیٹیں بند رکھنے کا اعلان کیا ہے۔