05 اپریل ، 2024
سابق اسسٹنٹ جیل سپرنٹنڈنٹ مجید قریشی کا کہنا ہے کہ پھانسی کا عمل صبح سویرے اس لیے مکمل کیا جاتا ہے تاکہ پھانسی کے وقت اندر یا باہر کوئی ناخوشگوار واقعہ پیش نہ ہو۔
جیو نیوز کو دیے گئے انٹرویو کے دوران صحافی اعزاز سید نےسابق اسسٹنٹ جیل سپرنٹنڈنٹ مجید قریشی سے سوال کیا کہ بہت سارے لوگ یہ سوال کرتے ہیں کہ پھانسی علی الصبح کیوں دی جاتی ہے، اس کی وجہ کیا ہے؟
جس کے جواب میں سابق اسسٹنٹ جیل سپرنٹنڈنٹ مجید قریشی نے بتایا کہ جیل عام طور پر علی الصبح بند ہوتی ہے اور ہم پھانسی کا عمل جیل کھلنے سے پہلے مکمل کر لیتے ہیں تاکہ پھانسی کے دوران کوئی ناخوشگوار واقعہ اندر یا باہر پیش نہ آئے لہٰذا ہم اندھیرے میں یہ سارے کام مکمل کر لیتے ہیں اور صبح کی اذان سے پہلے پہلے ہم اس کام سے فارغ ہو جاتے ہیں۔
انھوں نے مزید بتایا کہ پھانسی کیلئے تاریخ چاہے عدالت مختص کرے یا پھر جیل سپرنٹنڈنٹ مختص کرکے کورٹ سے کنفرم کروالے، پھانسی کا وقت جیل مینوئل میں دیا گیا ہے۔