امریکا نے غزہ میں اجتماعی قبروں کی دریافت پر اسرائیل سے جواب طلب کرلیا

واشنگٹن: امریکا نے غزہ میں اجتماعی قبروں کی دریافت پر اسرائیل سے جواب طلب کرلیا۔

وائٹ ہاؤس کی جانب سے جاری بیان میں کہا گیا ہےکہ غزہ پٹی کے 2 اسپتالوں میں اجتماعی قبروں کی دریافت کے بعد اسرائیلی حکام سے جواب چاہتے ہیں۔

امریکی مشیر برائے قومی سلامتی جیک سلیوان کا کہنا ہے کہ امریکا چاہتا ہے اس معاملے کی مکمل اور شفاف تحقیقات کی جائیں۔

امریکا اور سعودی عرب نے غزہ میں اجتماعی قبروں کی دریافت کو تشویشناک قرار دیدیا

یقین دلاتے ہیں کہ عالمی برادری کی غزہ میں انسانی قوانین کی خلاف ورزیوں پر اسرائیل کے احتساب کیلئے طریقہ کاربنانے میں ناکامی مزید خلاف ورزیوں کا سبب بنے گی: سعودی عرب

دوسری جانب غزہ سول ڈیفنس ایجنسی کے مطابق خان یونس کے ناصر اسپتال سے 340 افرادکی اجتماعی قبر ملی، غزہ شہرمیں الشفا اسپتال کے صحن سے تقریباً 30 افرادکی اجتماعی قبر دریافت ہوئی۔

عرب میڈیا کا بتانا ہے کہ خان یونس کے ناصر اسپتال میں اجتماعی قبروں سے مزید 35 لاشیں برآمد ہوئی ہیں، ناصراسپتال کی اجتماعی قبروں سے ملنے والی لاشوں کی تعداد 300 سے زیادہ ہوگئی ہے۔