عطاآباد… ضلع ہنزہ نگر میں عطاء آباد جھیل کے اسپل وے کو دھماکے سے اڑائے جانے کے بعد ممکنہ سیلابی صورتحال سے نمٹنے کے لئے انتظامات مکمل کرلئے گئے ہیں۔ سرکاری ذرائع کے مطابق دھماکے کے بعد اسپل وے کھلنے سے جھیل سے 50 ہزار کیوسک سے زائد پانی کے اخراج کا امکان ہے ، جس سے ہنزہ میں سیلابی صورتحال پیدا ہونے کا خدشہ ہے۔ ہنزہ نگر کی ضلعی انتظامیہ کی جانب سے دریا کے کنارے آباد لوگوں کو علاقہ خالی کرنے کے احکامات کے بعد بڑی تعداد میں لوگ نقل مکانی کرکے بلند مقامات پر چلے گئے ہیں، جبکہ نشیبی علاقوں کو جانیوالے راستوں پر پولیس اہلکار تعینات ہیں، ہنزہ اور گلگت کے درمیان شاہراہ قراقرم کو ہر قسم کی ٹریفک کیلئے بند کردیا گیا ہے اور عطاء آباد جھیل میں کشی سروس بھی معطل ہے، گلگت میں بھی ممکنہ سیلاب کے پیش نظر 15 دیہات خالی کروالئے گئے ہیں، جبکہ ضلع دیامر سے گزرنے والے دریائے سندھ میں بھی ممکنہ سیلابی صورتحال کے پیش نظر لوگوں کو ہائی الرٹ رہنے کی تاکید کی گئی ہے اور دریائے سندھ کے کناروں پر پولیس اہلکار تعینات کردئے گئے ہیں۔