لندن.. . . . . ..متحدہ قومی موومنٹ کے قائد الطاف حسین نے اعلان کیاہے کہ پاکستان کی تاریخ میں پہلی مرتبہ دنیائے فلم کا سب سے بڑااعزاز آسکرایوارڈحاصل کرنے پر پاکستان کی خاتون فلم سازشرمین عبیدچنائے کو ایم کیوایم کی جانب سے گولڈمیڈل دیاجائے گا۔ انہوں نے یہ اعلان آج نائن زیروپر رابطہ کمیٹی سے فون پرگفتگوکرتے ہوئے کیا۔ جناب الطاف حسین نے کہاکہ شر مین عبیدچنائے نے پاکستان میں خواتین کوتیزاب پھینک کر جلائے جانے کے بارے میں دستاویزی فلم بناکرخواتین کے ساتھ ہونے والے ظلم کودنیامیں جس موثراندازمیں پیش کیاہے اس پرانہیں آسکرایوارڈکاحقدارقراردیاگیاجوکہ نہ صرف شرمین عبید چنائے بلکہ پاکستان کیلئے ایک اعزاز ہے جس پرپوری قوم شرمین عبیدچنائے اوران کی ٹیم کو مبارکبادپیش کرتی ہے۔ جناب الطاف حسین نے رابطہ کمیٹی سے کہا کہ وطن واپسی پر شرمین عبیدچنائے کابھرپوراستقبال کیاجائے گا اوران کیلئے استقبالیہ کااہتمام کیاجائے گا۔ انہوں نے کہا کہ شرمین عبید چنائے نے یہ اعزازحاصل کرکے پوری دنیامیں پاکستان کانام روشن کیاہے اورپاکستانیوں کاسرفخرسے بلندکردیاہے۔ جناب الطاف حسین نے کہاکہ پاکستان میں ٹیلنٹ کی کمی نہیں ، ارباب اختیاراورحکمراں میرٹ کی بنیادپرٹیلنٹ کی قدرکریں توپاکستان کانام دنیابھرمیں مزید بلندیوں پر دکھائی دے گااوردنیا بھر میں پاکستان کی عزت اورقدرومنزلت میں اضافہ ہوگا۔