21 اگست ، 2024 
طالبان نے افغانستان کیلئے یو این نمائندہ برائے انسانی حقوق کے ملک میں داخلے پر پابندی عائد کر دی
21 اگست ، 2024
طالبان نے افغانستان کے لیے اقوام متحدہ کے نمائندہ برائے انسانی حقوق رچرڈ بینیٹ کے ملک میں داخلے پر پابندی عائد کر دی۔
افغان میڈیا کے مطابق ترجمان افغان حکومت ذبیح اللہ مجاہد کا کہنا ہے کہ اقوام متحدہ کے نمائندے رچرڈ بینیٹ افغانستان کے خلاف پروپیگنڈا پھیلانے میں ملوث تھے، رچرڈ بینیٹ کا افغانستان کا سفر ممنوع قرار دیا گیا ہے۔
ذبیح اللہ مجاہد نے مزید کہا کہ یو این نمائندے رچرڈ بینیٹ کو افغانستان میں پروپیگنڈہ پھیلانے کا کام سونپا گیا تھا، رچرڈ بینیٹ پر بھروسہ نہیں کیا جا سکتا، وہ معمولی معاملات کو بڑھا چڑھا کر بیان کرتے تھے، انہیں اب افغانستان آنے کی اجازت نہیں ہے۔
افغان میڈیا کا بتانا ہے کہ اقوام متحدہ کے نمائندے رچرڈ بینیٹ نے رپورٹس میں افغانستان میں انسانی حقوق کی خلاف ورزیوں کو مسلسل تنقید کا نشانہ بنایا تھا۔
اقوام متحدہ کی انسانی حقوق کونسل نے اپریل 2022 میں رچرڈ بینیٹ کو افغانستان کے لیے اپنا خصوصی نمائندہ مقرر کیا تھا، رچرڈ بینیٹ کا کام افغانستان میں انسانی حقوق کی خلاف ورزیوں کو دستاویزات کی شکل دینا تھا۔
