پاکستان

ایف بی آر افسران نے ریونیو شارٹ فال کا ذمہ دار موجودہ انتظامیہ کو قرار دیدیا

02 دسمبر ، 2024

ایف بی آر افسران نے ریونیو شارٹ فال کا ذمہ دار موجودہ انتظامیہ کو قرار دیدیا — نام نہاد ٹرانسفارمیشن پلان کے نام پر پالیسیاں بناکر عمل کیا جا رہا ہے، گزشتہ سال ہم نے اسی افرادی قوت کے ساتھ مقرر کردہ تمام اہداف حاصل کیے: اعلامیہ آئی آر ایس او اے۔ فوٹو فائل

فیڈرل بورڈ آف ریونیو (ایف بی آر) افسران نے ریونیو شارٹ فال کا ذمہ دارموجودہ انتظامیہ کو قرار دے دیا۔

ان لینڈ ریونیو سروس آفیسرز ایسوسی ایشن (آئی آر ایس او اے) کی جانب سے جاری اعلامیے میں کہا گیا ہے کہ ناتجربہ کاری اور گمراہ کن پالیسیوں کے باعث ریونیو میں 356 ارب روپے کی کمی آئی، ریونیو ٹارگٹ میں ناکامی کی وجہ موجودہ ابف بی آر انتظامیہ کی پالیسیاں ہیں۔

ایسوسی ایشن کا کہنا ہے کہ نام نہاد ٹرانسفارمیشن پلان کے نام پر پالیسیاں بناکر عمل کیا جا رہا ہے، ٹرانسفارمیشن پلان افسران میں بے چینی پھیلی اور شدید انحراف کا باعث بنا، اس پلان کے باعث ریونیو اکٹھا کرنے کی کوششیں بھی متاثر ہوئیں۔

یہ بھی پڑھیں

ان لینڈ سروس آفیسرز کے جاری اعلامیے میں کہا گیا ہے کہ 80 فیصد جونیئر فیلڈ افسران وفاق میں سب سے کم تنخواہ پر کام کر رہے ہیں، فیلڈ افسران کو ٹرانسپورٹ، فیول اور رہائشی سہولیات بھی نہیں دی جا رہیں، جونیئر افسران کے بنیادی سہولیات کے بغیر دور دراز علاقوں میں تبادلے کیے گئے۔

اعلامیے کے مطابق جونئیر افسران کو کرپشن کا لیبل لگا کر بدنام کیا گیا، یہ تمام چیزیں جونیئر افسران میں مزید عدم اطمینان کا باعث بنیں، گریڈ 18 سے 19 تک ڈپارٹمنٹل پروموشن بورڈ کے انعقاد میں تاخیر پر شدید تحفظات ہیں۔

ان لینڈ سروس آفیسرز کے مطابق ڈپارٹمنٹل پروموشن بورڈ کے انعقاد میں تاخیر کی ٹھوس وجہ نہیں بتائی گئی، گزشتہ سال ہم نے اسی افرادی قوت کے ساتھ مقرر کردہ تمام اہداف حاصل کیے، ایسوسی ایشن پاکستان کے بہترین مفاد میں کام کرنے کے اپنے عزم کا اعادہ کرتی ہے۔