سکیورٹی فورسز کی خیبر پختونخوا میں کارروائیاں، لیفٹیننٹ سمیت 4 جوان شہید،7 دہشتگرد ہلاک

سکیورٹی فورسز کی خیبر پختونخوا میں 2 کارروائیوں میں بھارتی حمایت یافتہ فتنہ الخوارج کے 7 دہشت گرد ہلاک ہوگئے، شدید فائرنگ کے تبادلے کے دوران لیفٹیننٹ  سمیت 4 جوان شہید ہوگئے۔

آئی ایس پی آر کے مطابق 28 اور 29 مئی کی درمیانی شب خوارج نے شمالی وزیرستان کے علاقے شوال میں سکیورٹی فورسز کی چیک پوسٹ پر حملےکی کوشش کی۔ سکیورٹی فورسز نے خوارج کی کوشش کو مؤثر طریقے سے ناکام بنایا۔

 آئی ایس پی آرکے مطابق شوال میں فائرنگ کے تبادلے میں بھارتی حمایت یافتہ 6 خوارج مارےگئے، شدید فائرنگ کے تبادلےکے دوران لیفٹیننٹ دانیال اسماعیل سمیت 4 جوان شہید ہوئے۔

آئی ایس پی آر کا کہنا ہےکہ شہید لیفٹیننٹ دانیال اسماعیل آپریشن کی فرنٹ سے قیادت کر رہے تھے۔ ان کے ساتھ نائب صوبیدار کاشف رضا، لانس نائیک فیاقت علی اور سپاہی محمد حمید نے جام شہادت نوش کیا۔

آئی ایس پی آر کے مطابق 24 سال کے لیفٹیننٹ دانیال اسماعیل شہیدکا تعلق ضلع مردان سے ہے،لیفٹیننٹ دانیال اسماعیل شہید کے سوگواران میں والد  اور بھائی شامل ہیں۔ 42سال کے نائب صوبیدار کاشف رضا شہید کا تعلق ضلع چکوال سے ہے،کاشف رضا شہید کے سوگواران میں اہلیہ ، 1 بیٹی اور 2 بیٹے شامل ہیں۔ 35 سال کے لانس نائیک فیاقت علی شہید کا تعلق ضلع ہری پور سے ہے، لانس نائیک فیاقت علی شہید کے سوگواران میں اہلیہ 1 بیٹی اور 3 بیٹے شامل ہیں۔ 26 سال کے سپاہی محمد حمید شہیدکا تعلق ضلع ایبٹ آباد سے ہے، سپاہی محمد حمید شہید کے سوگواران میں والدہ شامل ہیں۔

آئی ایس پی آر کے مطابق سکیورٹی فورسز  نے دوسری کارروائی  چترال میں کی جہاں ایک خارجی دہشت گرد ہلاک ہوگیا۔

 آئی ایس پی آر کا کہنا ہےکہ علاقے میں خارجیوں کے خاتمے کے لیےکلیرئنس آپریشن جاری ہے، سکیورٹی فورسز بھارتی پشت پناہی میں ہونے والی دہشت گردی کے مکمل خاتمےکے لیے پرعزم ہیں، بہادر سپوتوں کی یہ قربانیاں ہمارے حوصلے اور عزم کو مزید مضبوط کرتی ہیں۔