اسلام آباد… سپریم کورٹ نے سابق وزیراعظم بینظیر بھٹو کے قتل کیس میں ایف آئی اے کے فریق بننے کی درخواست منظور کرلی ہے ، عدالت نے مقدمہ کے فریق سابق صدر جنرل ریٹائرڈ پرویزمشرف کے گھر پر عدالتی نوٹس چسپاں کرنے کا حکم دے دیا ہے ۔ بینظیربھٹو کے سابق پروٹوکول آفیسر اسلم چودھری نے سابق وزیراعظم کے قتل کیس کی نئی ایف آئی آر درج کرکے اس میں موجودہ اور سابق 12 اہم حکمران شخصیات کے نام شامل کرنے کی اپیل دائر کی، چیف جسٹس افتخارچودھری کی سربراہی میں عدالتی بنچ نے اس مقدمہ کی سماعت کی ، عدالت کو بتایاگیاکہ مقدمہ کی نامزدفریقی پرویزمشرف اور بابراعوان کو بھیجے گئے جوابدہی نوٹس کی تعمیل نہیں ہوسکی، رحمن ملک کے وکیل ملک سے باہر ہیں، عدالت نے پرویزمشرف کے گھر پر نوٹس چسپاں کرنے اور بابراعوان کو نوٹس ، اٹارنی جنرل کے ذریعے بھیجنے کا حکم دیا،عدالت نے فریقین پولیس آفیسرز سعودعزیز،خرم شہزاد، یاسین فاروق کو نوٹس بذریعہ آئی جی پنجاب بھیجنے کا حکم بھی دیا، ایف آئی اے کی طرف سے مقدمہ میں فریق بننے کی درخواست زیر سماعت آئی تو پنجاب کے ایڈووکیٹ جنرل نے اس پر اعتراض نہ کیا ، پھر عدالت نے درخواست منظور کرتے ہوئے مقدمہ کی سماعت 2 ہفتوں کے لئے ملتوی کردی ۔