اسلام آباد… سپریم کورٹ نے سابق وزیراعظم بینظیر بھٹو کے قتل کیس دوسری ایف آئی آر درج کرنے کے مقدمہ میں سابق صدر جنرل ریٹائرڈ پرویز مشرف کے گھر پرجوابدہی نوٹس چسپاں کرنے کا حکم دے دیا ہے جبکہ پنجاب پولیس نے دوسری ایف آئی آر درج کرنے کی مخالفت کردی ہے ۔ بینظیربھٹو کے سابق پروٹوکول آفیسر اسلم چودھری نے سابق وزیراعظم کے قتل کیس کی نئی ایف آئی آر درج کرکے اس میں موجودہ اور سابق 12 اہم حکمران شخصیات کے نام شامل کرنے کی اپیل دائر کی، چیف جسٹس افتخارچودھری کی سربراہی میں عدالتی بنچ نے اس مقدمہ کی سماعت کی ، عدالت کو بتایاگیاکہ مقدمہ کی نامزدفریقی پرویزمشرف اور بابراعوان کو بھیجے گئے جوابدہی نوٹس کی تعمیل نہیں ہوسکی، رحمن ملک کے وکیل ملک سے باہر ہیں، عدالت نے پرویزمشرف کے گھر پر نوٹس چسپاں کرنے اور بابراعوان کو نوٹس ، اٹارنی جنرل کے ذریعے بھیجنے کا حکم دیا،عدالت نے فریقین پولیس آفیسرز سعودعزیز،خرم شہزاد، یاسین فاروق کو نوٹس بذریعہ آئی جی پنجاب بھیجنے کا حکم بھی دیا،راول پنڈی کے سی پی اور ڈی پی او پولیس کی طرف سے پراسیکیوٹر جنرل پنجاب نے جواب داخل کیا ، اسکے مطابق قتل کیس کا پہلے ہی مقدمہ درج ہے،اسکا چالان پیش بھی ہوچکا ہے،،اپیل کنندہ اسلم چودھری واقعہ کے متاثرہ فریق نہیں ہیں، اسلئے دوسری ایف آئی آر کا اندراج نہیں ہوسکتا، ایف آئی اینے اس مقدمہ میں فریق بننے کی درخواست دی تو عدالت نے اسے منظور کرتے ہوئے مقدمہ کی سماعت 2 ہفتوں کے لئے ملتوی کردی۔