ابوظہبی…پہلے کرکٹ ٹیسٹ کے دوسرے روز جنوبی افریقا کی ٹیم اپنی پہلی اننگز میں 249 رنز بناکر آؤٹ ہوگئی۔ ابوظہبی میں کھیلے جارہے ٹیسٹ میں جنوبی افریقا نے 245 رنز 8 کھلاڑی آؤٹ پر اپنی نامکمل اننگز کا آغاز کیا، لیکن اسکور میں کوئی اضافہ کیے بغیر ہاشم آملہ محمد عرفان کی گیند پر یونس خان کے ہاتھوں کیچ آؤٹ ہوگئے، انہوں نے 118 رنز بنائے۔ مجموعی اسکور میں صرف چار رنز کے اضافے کے بعد ڈیل اسٹین 15 رنز بناکر آؤٹ ہوگئے، یوں جنوبی افریقا کی پوری ٹیم 249 رنز بناسکی۔محمد عرفان اور ذوالفقار بابر نے تین، تین سعید اجمل نے دو جبکہ جنید خان نے ایک وکٹ حاصل کی۔دو ٹیسٹ میچوں کی سیریز کے پہلے ٹیسٹ میچ کے پہلے دن کھیل ختم ہونے تک جنوبی افریقہ نے اپنی پہلی اننگز میں 8وکٹوں کے نقصان پر 245رنز بنائے تھے۔نیوٹرل مقام پر کھیلی جانے والی اس سیریزمیں افریقی الیون نے اپنے کپتان کو مایوس کیا، سوائے ہاشم آملہ 118ناٹ آوٴٹ اور جے پی ڈومینی 57کے کوئی اور بیٹسمین پاکستانی بولروں کا ڈٹ کر مقابلہ نہ کرسکااور یکے بعد دیگرے پویلین لوٹتے رہے۔جب میچ کا پہلے دن کا کھیل ختم ہوا تو پروٹیز نے 90اوور ز کے کھیل میں 8وکٹوں کے نقصان پر 245رنز بنائے تھے اور ہاشم آملہ 118ناٹ آوٴٹ اور ڈیل اسٹین 13پر بیٹنگ کررہے تھے۔