اسلام آباد…سپریم کورٹ نے بجلی کی قیمتوں میں دی جانیوالی سبسڈی واپس لینے پر حکومت سے جواب طلب کرتے ہوئے پیپکو اور نیپرا کو گزشتہ برسوں میں دی جانیوالی سبسڈی کا ریکارڈ مرتب کرا کر عدالت پیش کرنے کا حکم دیا ہے۔ چیف جسٹس افتخار محمد چوہدری نے کہا ہے کہ پاکستان ایک فلاحی ریاست ہے،عوامی مفادات کیخلاف فیصلے نہیں کیے جا سکتے،حکومت کو سبسڈی واپس لینے کی وجوہات بتانا ہونگی۔پیر کو چیف جسٹس افتخار محمد چوہدری کی سربراہی میں 3 رکنی بنچ نے لوڈشیڈنگ اور بجلی کی قیمتوں سے متعلق کیس کی سماعت کی۔اس موقع پر عدالت عظمیٰ نے حکومت سے بجلی کی قیمتوں میں دی جانیوالی سبسڈی واپس لینے پر جواب مانگ لیا ہے۔چیف جسٹس افتخار محمد چودھری نے پیپکو اور نیپرا کو حکم دیا ہے کہ گزشتہ سالوں میں دی جانیوالی سبسڈی کا ریکارڈ آج ہی مرتب کرا کر عدالت پیش کیا جائے۔چیف جسٹس نے استفسار کیا کہ کیا سبسڈی ختم کرنے کیلئے صارفین کا موقف سنا گیا، ان کا کہنا تھا کہ ہمارا ملک ایک فلاحی ریاست ہے،عوامی مفاد کیخلاف فیصلے نہیں کیے جا سکتے، حکومت کو سبسڈی واپس لینے کی وجوہات بتانا ہونگی۔