لندن…متحدہ قومی موومنٹ کے قائدالطاف حسین نے آج کوہاٹ ،ہنگو اورراولپنڈی میں ہونے والے تشددکے واقعات پرشدیدافسوس کا اظہار کیا ہے ۔ اپنے بیان میں انھوں نے کہاکہ راولپنڈی میں یوم عاشورپر ہونے والاواقعہ دلخراش اورنہایت افسوسناک ہے جس پر سب کے ہی دل خون کے آنسورورہے ہیں۔انہوں نے تمام شیعہ،سنی اوردیگر مکاتب فکر سے تعلق رکھنے والے عوام سے اللہ اوررسول کے نام پر دردمندانہ اپیل کرتے ہوئے کہاکہ راولپنڈی کاسانحہ یقینا ملک میں فرقہ وارنہ فسادکی آگ بھڑکانے کی سازش ہے ،عوام خدارا اس سازش کوسمجھیں اورآپس میں باہم دست وگریباں ہونے سے گریزکریں، صبروتحمل اورضبط وبرداشت سے کام لیں، ایک دوسرے جان ومال اوراملاک کونقصان نہ پہنچائیں، جس کاجوبھی عقیدہ ہو، سب ایک اللہ ،ایک رسول اورایک کتاب قرآن مجید کے ماننے والے ہیں۔کون صحیح ہے ،کون غلط ہے اس کافیصلہ اللہ تعالیٰ کوکرنے دیں ۔ انہوں نے تمام مکاتب فکرکے علمائے کرام ، مشائخ عظام اورذاکرین سے درخواست کی کہ وہ فرقہ وارانہ ہم آہنگی کیلئے اپنا کردار ادا کریں اوراپنے اپنے خطاب میں عوام کوفرقہ وارانہ ہم آہنگی کادرس دیں۔ الطاف حسین نے حکومت سے مطالبہ کیاکہ عوام کی جان ومال ،املاک ، مساجد، امام بارگاہوں اورمدرسوں کے تحفظ کیلئے موٴثر اقدامات کئے جائیں ۔