ویلنگٹن…ویلنگٹن ٹیسٹ کے چوتھے روز جنوبی افریقا کے فاسٹ بالر فلینڈر کی شاندار بالنگ کے باعث نیوزی لینڈ کی ٹیم پروٹیز کے 474 رنز کے جواب میں 275 رنز بناکر آؤٹ ہوگئی۔ فلینڈر نے 6 کھلاڑیوں کو آؤٹ کیا، وہ ٹیسٹ کرکٹ کی 116 سالہ تاریخ میں تیز ترین 50 وکٹیں حاصل کرنے والے کھلاڑی بن گئے۔ انہوں نے یہ کارنامہ اپنے کیریئر کے صرف ساتویں ٹیسٹ میں انجام دیا۔ ویلنگٹن میں کھیلے جارہے تیسرے ٹیسٹ کے چوتھے روز نیوزی لینڈ نے 65 رنز بغیر کسی کے نقصان کے اپنی نامکمل اننگز شروع کی لیکن اس کی پوری ٹیم 275 رنز بناسکی اور صرف ایک رن کے فرق سے فالو آن بچانے میں کامیاب ہوگئی۔ گپتل 59 اور فلائن 45 رنز کے ساتھ نمایاں رہے۔ ویرن فلینڈر نے 6 کھلاڑیوں کو آؤٹ کیا۔ کھیل کے اختتام پر جنوبی افریقا نے اپنی دوسری اننگز میں بغیر کوئی وکٹ گنوائے 75 رنز بنالیے، اس طرح اسے نیوزی لینڈ کے خلاف مجموعی طور پر 274 رنز کی برتری حاصل ہوگئی ہے جبکہ اس کی 10 وکٹیں باقی ہیں۔ پیٹرسن 38 اور اسمتھ 34 رنز پر ناٹ آؤٹ ہیں۔ تین میچوں کی سیریز میں جنوبی افریقا کو ایک۔ صفر کی برتری حاصل ہے۔