لاہور…آئی جی پولیس پنجاب حبیب الرحمن کا کہنا ہے کہ تھانہ کلچر، پولیس کا یونیفارم اور تھانے کا انتظامی ڈھانچہ تبدیل کیا جا رہا ہے۔ جیو نیوز کے نمائندے امین حفیظ کو انٹرویو دیتے ہوئے آئی جی پنجاب کا کہنا تھا کہ سابق گورنر سلمان تاثیر کا بیٹا شہباز تاثیر زندہ ہے اور اسے جلد بازیاب کرا لیا جائے گا۔ آئی جی پنجاب کا کہنا ہے کہ تھانوں کو دہشت کا نہیں بلکہ محبت کا گھر ہونا چاہئے، اس لئے پولیس کی کالی وردی کا رنگ تبدیل کیا جارہا ہے ،یہ بات انہوں نے ڈی پی او آفس رحیم یارخان میں پریس کانفرنس سے خطاب کرتے ہوئے کہی، آئی جی پولیس پنجاب حبیب الرحمان کا کہنا تھا کہ پنجاب کی آبادی کے لحاظ سے پولیس کی نفری کم ہے ، جو دوگنی ہونی چاہئے، انہوں نے کہا کہ شیخو پورہ اور سرگودھا سے غیر قانونی اسلحے اور عقوبت خانوں کے خاتمے کے لئے مہم شروع کردی ہے، پولیس افسران سیاسی دباوٴ میں نہ آئیں میرٹ پر کام کریں،آئی جی پولیس پنجاب کا کہنا تھا کہ تھانہ بنگلہ ایچھا کو ضلع رحیم یارخان میں شامل کرنے کی تجویز آئی تو عمل ہوسکتا ہے، پولیس کے شہدا کی امدادی رقوم ملنے میں تاخیر کانوٹس لے لیا گیا ہے یہ مسئلہ جلد حل ہوجائے گا۔