لندن…گورنرسندھ ڈاکٹرعشرت العبادخان اورسابق وزیرداخلہ اورپیپلزپارٹی کے رہنماء سینٹررحمن ملک نے بدھ کی شب ایم کیوایم کے قائد الطاف حسین سے لندن میں تفصیلی ملاقات کی ۔ اس موقع پر رابطہ کمیٹی کے ڈپٹی کنوینرندیم نصرت بھی موجودتھے ۔ ملاقات انتہائی خوشگوارماحول میں ہوئی جس میں اس بات پر اتفاق کیاگیاکہ پاکستان کواس وقت جن داخلی وخارجی چیلنجز کاسامنا ہے اس کے پیش نظر ملک کی تمام جماعتوں اورعوام کے تمام طبقات کے مابین اتحادواتفاق کی اشدضرورت ہے۔ ملاقات میں اس بات پر بھی اتفاق کیا گیاکہ سندھ میں آباد تمام طبقات کے مابین نفاق نہیں بلکہ یکجہتی اورافہام وتفہیم کاہوناضروری ہے ۔ ملاقات میں سیاسی قوتوں بالخصوص ایم کیوایم اورپیپلزپارٹی کے مابین دہشت گردی اورانتہاپسندی کے خلاف ہم آہنگی اوربہترتعلقات کی ضرورت پر بھی اتفاق کیا گیا۔ گورنرسندھ ڈاکٹرعشر ت العباد نے پاکستان کودرپیش مسائل وچیلنجز سے تفصیل سے آگاہ کیا اورصوبوں اوروفاق کے درمیان ہم آہنگی اوراتفاق رائے بڑھانے کی ضرورت سے آگاہ کیا۔گورنرسندھ ڈاکٹرعشرت العباد نے کہاکہ دہشت گردی کے خاتمہ کیلئے جہاں پوری قوم کامتحدہونا ضروری ہے وہاں ملک کی سیاسی قوتوں کوتمام تر سیاسی مصلحتوں کوبالائے طاق رکھ کرملکی بقاء اوراستحکام کیلئے متحد ہونابھی اشدضروری ہے۔ سینیٹررحمن ملک نے اس موقع پر الطاف حسین کوپیپلزپارٹی کے شریک چیئرمین اورسابق صدر آصف زرداری کاخصوصی پیغام پہنچایا اورخیرسگالی کے جذبات پہنچائے، الطا ف حسین نے بھی سابق صدر کیلئے نیک خواہشات کا اظہارکیا۔دریں اثنائالطاف حسین نے کراچی کے علاقے ْقصبہ کالونی میں یکے بعد دیگرے بم دھماکوں کی شدید الفاظ میں مذمت کی ہے اور واقعہ میں متعدد شہریوں کے زخمی ہونے پر گہرے دکھ اور افسوس کا اظہار کرتے ہوئے مطالبہ کیا ہے کہ واقعہ میں ملوث سفا ک درندہ صفت عناصر کو فی الفور گرفتار کیا جائے ۔ ایک بیان میں انھوں نے کہا کہ سفاک دہشتگرد پولیس ،سیکوریٹی فورسز کے افسران و اہلکاروں اوربے گناہ معصوم شہریوں کو کھلی دہشت گردی کانشانہ بنا رہے ہیں تاہم اس کے باوجود حکومت ملک و قوم کو دہشت گردی کے عفریت سے نجات دلانے کیلئے نہ تو کوئی ٹھوس لائحہ عمل ، منصوبہ بندی اورحکمت عملی مرتب کرسکی ہے ۔ الطاف حسین نے وزیر اعلیٰ سندھ قائم علی شاہ سے مطالبہ کیا کہ وہ قصبہ کالونی میں دھماکوں کانوٹسلیں اور اس میں ملوث دہشت گردوں کو گرفتارکرکے قرار واقعی سزا دی جائے۔