کراچی …افضل ندیم ڈوگر…کالعدم تحریک طالبان پاکستان نے جنگ بندی کا جو خط تحریر کیا ہے اس کا متن درج ذیل ہے:
بسم اللہ الرحمن الرحیم
تحریک طالبان پاکستان نے نیک مقاصد اور سنجیدگی کے ساتھ حکومت کے ساتھ مذاکرات کا آغاز کیا ہے، ہم ایک اصولی جماعت ہیں، ہر فیصلہ شوریٰ کے اتفاق اور امیر محترم کی تائید کے ساتھ طے کرتے ہیں، مذاکراتی عمل میں پیدا شدہ ڈیڈلاک کے خاتمے اور جنگ بندی کیلئے ہماری طرف سے اپنی مذاکراتی کمیٹی کو دیے گئے تجاویز کا حکومت کی طرف سے مثبت جواب دیا گیا ہے اور ان تجاویز پر عملدرآمد کی پر اعتماد یقین دہانی کرائی جاچکی ہے۔
لہٰذا تحریک طالبان پاکستان ملک کے اکابر علمائے کرام کی اپیل، طالبان کمیٹی کے احترام اور اسلام اور ملک کے بہتر مفاد میں ایک مہینے کیلئے جنگ بندی کا اعلان کرتی ہے۔ تحریک طالبان کی اعلیٰ قیادت کی طرف سے اپنے تمام حلقہ جات اور مجموعات کو ہدایت جاری کی جاتی ہے کہ تحریک طالبان کی طرف سے حکومت کے ساتھ جنگ بندی کے اعلامیے کا احترام کرتے ہوئے اس کی مکمل پاسداری کریں اور اس دوران ہر قسم کی جہادی کارروائیوں سے گریز کریں۔
ہم امید رکھتے ہیں کہ حکومت ہمارے اس فیصلے پر سنجیدگی سے غور کرے گی اور مذاکراتی عمل کو ہر قسم کی سیاست سے دور رکھ کر اس معاملے میں مثبت پیش رفت کرے گی۔
شاہد اللہ شاہد
مرکزی ترجمان تحریک طالبان پاکستان
01-03-2014