ڈیرہ الله یار…ملک کو دہشت گردی کی لعنت سے نجات دلانے کیلئے طالبان مخالف قوتوں کو اکٹھا کریں گے، یہ وقت طالبان سے مذاکرات کا نہیں بلکہ دہشت گردوں کے خلاف آپریشن کا ہے ،نواز شریف نے وطن عزیز کو طالبان کے رحم و کرم پر چھوڑ دیا ہے،ملک بھر میں شیعہ سنی عوام متحد ہوچکے ہیں اور انشاء اللہ وطن دوستوں سے محبت کرنے والی عوام کا سمندر طالبان دہشت گردوں کو بہا کر لے جائے گا، تھرپارکر میں بھوک سے معصوم بچوں کی اموات پر سندھ حکومت فوری مستعفی ہوجائے۔ ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری، سنی اتحاد کونسل کے مرکزی رہنما مفتی سعید رضوی، علامہ مقصود علی ڈومکی، صاحبزادہ حسن رضا، اسد عباس نقوی سمیت دیگر رہنماوٴں نے ڈیرہ اللہ یار میں ایم ڈبلیو ایم بلوچستان کے تحت ” لبیک یا رسول اللہ (ص) کانفرنس “ کے اجتماع سے خطاب کرتے ہوئے کیا۔انھوں نے کہ ہمارا وطن دہشت گردوں کی جنت بن چکا ہے، ضیائی اسٹیبلشمنٹ نے جس ناسور کو پالا تھا آج وہ طالبان کی شکل میں ہمارے ملک کی جڑوں کو کھوکھلا کررہا ہے، وقت آگیا ہے کہ محب وطن قوتیں پاکستان کو بچانے کیلئے یکجا ہوں اور دہشت گردی کی لعنت سے ملک کو نجات دلانے کے لئے میدان میں اتریں،اجتماع سے خطاب میں سنی اتحاد کونسل کے مرکزی رہنما مفتی سعید رضوی نے کہا کہ یہ وقت طالبان سے مذاکرات کا نہیں دہشت گردوں کے خلاف آپریشن کا ہے ، عوام نے دیکھ لیا کہ حکومت نے مذاکرات کی پیشکش تو کی لیکن دہشت گردوں نے افواج اور عوام کو اپنی بربریت کا نشانہ بنانے کا سلسلہ بند نہیں کیا، ایسے لوگوں سے مذاکرات سے ریاست کمزور ہوگی، ایسے دہشت گردوں کا صفایا کرنا ہوگا۔ دیگر مقررین نے کہا کہ مذاکرات کے نام پر ملک کو طالبان کے حوالے کیا جارہا ہے، اگر حکومت نے 60ہزار شہداء کی قربانیوں کو فراموش کیا تو مظلوم عوام کا سمندر نواز شریف کی حکومتکو بہا لے جائے گا۔