09 اپریل ، 2012 
گیاری حادثہ: امریکی ریسکیو ٹیم کو بریفنگ، برطانیہ کی بھی مدد کی پیشکش
09 اپریل ، 2012
اسلام آباد … امریکی سفارت خانے کا کہنا ہے کہ سیاچن کے گیاری سیکٹر میں ریسکیو آپریشن کیلئے آنیوالی امریکی ٹیم کو اسلام آباد میں بریفنگ دی گئی ہے جبکہ برطانیہ نے بھی پاکستان کو مدد کی پیشکش کی ہے۔ امریکی سفارت خانے کے ترجمان مارک اسٹرا نے جیو نیوز کو بتایا ہے کہ امریکی ٹیم اسلام آباد میں بریفنگ لینے کے بعد گیاری کیلئے روانہ ہو جائے گی۔ پاکستان نے امریکا سے ایک امدادی ٹیم کیلئے کہا تھا، مزید ٹیموں کی ضرورت ہوئی تو وہ بھی مہیاکی جائیں گی۔ برطانوی ہائی کمیشن نے بھی پاکستان کو امداد کی پیشکش کی تصدیق کرتے ہوئے کہا ہے کہ برطانوی چیف آف ڈیفنس اسٹاف جنرل سر ڈیوڈ رچرڈز نے آرمی چیف جنرل اشفاق پرویز کیانی سے ٹیلے فون پر بات کی ہے اور ریسکیو آپریشن میں مدد کی پیش کش کی ہے۔
