لندن…متحدہ قومی موومنٹ کے قائد الطاف حسین نے پاکستان عوامی تحریک کے سربراہ ڈاکٹرطاہرالقادری کی وطن واپسی پر حکومت کی جانب سے طرح طرح کی رکاوٹیں کھڑی کرنے اوران کے طیارے کواسلام آباداترنے کی اجازت نہ دینے اوراسے لاہورکی جانب موڑ دینے کی شدیدمذمت کی ہے۔ ا پنے ایک بیان میں انہوں نے کہاکہ کسی بھی سیاسی یامذہبی جماعت کے کارکنوں کاسیاسی وجمہوری حق ہے کہ وہ اپنے رہنماکااستقبال کریں۔آج ڈاکٹرطاہرالقادری کے ہزاروں کارکنان بھی ان کااستقبال کرنے اسلام آباد ایئرپورٹ پہنچے تھے لیکن حکومت کی جانب سے اسلام آبادکوجس طرح سیل کیاگیا، جس طرح پاکستان عوامی تحریک کے کارکنوںکی راہ میں رکاوٹیں کھڑی کی گئیں ،ان پر شیلنگ کی گئی اورانہیں روکاگیاوہ قابل مذمت ہے۔ الطاف حسین نے کہاکہ حکومت کوچاہیے کہ وہ ہوشمندی کامظاہرہ کرے اور پاکستان عوامی تحریک کے خلاف انتقامی کارروائیوں کاسلسلہ بندکرے۔ دریں اثنا الطا ف حسین کی خصوصی ہدایت پر ایم کیو ایم رابطہ کمیٹی کے ارکا ن اورحق پرست اراکین قومی اسمبلی پر مشتمل دو مختلف وفود نے پیر کے روز پاکستا ن عوا می تحریک کے سر براہ ڈاکٹر طاہر القادری کی پاکستان آمد کے موقع پر اسلام آبا د کے بینظیر انٹر نیشنل ائیر پورٹ اور لاہور میں علامہ اقبال انٹر نیشنل ائیر پورٹ پرانکے استقبال کے لئے موجود تھے۔لاہور کے علامہ اقبال انٹر نیشنل ائیر پورٹ پررکن رابطہ کمیٹی امین الحق ، صوبائی وزیر عبد الحسیب ،اراکین قومی اسمبلی آصف حسنین اور ریحا ن ہاشمی نے لاہو ر کے ذمہ داران و کارکنان نے جبکہ ایم کیو ایم رابطہ کمیٹی کے اراکین افتخار اکبر رندھاوا ، میاں عتیق ، قومی اسمبلی میں ایم کیو ایم کی جانب سے پارلیمانی لیڈر اوررکن رابطہ کمیٹی رشید گوڈیل ،سابق وفاقی وزیر اقبال محمد علی خان ، رکن قومی اسمبلی عبد الوسیم اور ایم کیو ایم اسلام آباد کے کارکنان پر مشتمل دوسرا وفد اسلام آباد کے بینظیر انٹرنیشنل ائیر پورٹ پر ڈاکٹر طاہر القادری کا استقبال کیا اور انھیں وطن واپسی پر مبارک باد پیش کی۔