کراچی.......متحد ہ قومی موومنٹ کی رابطہ کمیٹی کے رکن سید حیدر عباس رضوی نے کہا ہے کہ الطاف حسین کی 35سالہ سیاسی زندگی میں متعدد مرتبہ مختلف سیاسی جماعتوں کے قائدین اور دیگر قوتوں نے الطاف حسین کا جینا حرام کرنے کی کوشش کی ہے لیکن ملک کی سیاسی تاریخ شاہد ہے کہ خدا کی قدرت سے ایسے عناصر کا خود جینا حرام ہوگیا ہے ۔ انہوں نے کہا کہ پیپلز پارٹی اپنی گرتی ہوئی سیاسی ساکھ کو بچانے کیلئے 18اکتوبر کو کراچی میں جلسہ کرنے جارہی ہے ایسے میں پیپلز پارٹی کے چیئر مین بلاول زرداری کا بیان معنی خیز اور الطاف حسین کے چاہنے والوں کے لئے تشویش کا باعث ہے ایم کیوا یم کی رابطہ کمیٹی نے مذکورہ زہر آلود بیان کا انتہائی سنجیدگی سے جائزہ لیا ہے اور ہم عید الاضحی کے بعد اس سلسلے میں اپنے واضح رد عمل کا اعلان کریں گے۔ ان خیالات کا اظہار انہوں نے پیر کی سہ پہر فیڈرل بی ایریا میں واقع طارق گراؤنڈ میں اہم پریس کانفرنس سے خطا ب کرتے ہوئے کیا ۔ اس موقع پر ایم کیو ایم رابطہ کمیٹی کے ارکان عامر خان ، محمد واسع جلیل ، گلفراز خان خٹک اور سینیٹر بابر خان غوری انکے ہمراہ تھے ۔حیدر عباس رضوی نے کہا کہ جب پاکستان سمیت دنیا بھر میں مسلمان سنت ابراہیمی کا فریضہ سر انجام دیتے ہوئے قربانی کر رہے ہیں اور ایک خاص ماحول بنا ہوہے ایسے میں بلاول زرداری کا بیان افسوسناک ہے، ایم کیوایم کی رابطہ کمیٹی ، پاکستان سمیت دنیا بھر میں مقیم ایم کیو ایم کے کارکنان اور الطاف حسین کے کروڑوں چاہنے والے بلاول زرداری کے الطاف حسین کے متعلق زہر آلود و متعصب بیان کی سخت الفاظ میں مذمت کرتے ہیں ، پیپلز پارٹی کے چیئر مین اپنی تقریر کے دوران تحریر شدہ بیان کو پڑھ کر سنایا جس سے صاف ظاہر ہے کہ مذکورہ بیان جوش خطابت میں نہیں بلکہ پیپلز پارٹی کی الطاف حسین اورایم کیو ایم کے خلا ف متعصب و دوغلی پالیسی کا حصہ ہے اور اس بیان سے بلاول زرداری اور پیپلز پارٹی کے دل میں الطاف حسین کے خلاف بغض کھل کر سا منے آگیا ہے۔انہوں نے کہا کہ پیپلز امن کمیٹی کے سربراہوں اور کارکنوں نے گزشتہ سالوں میں ایم کیو ایم کے کارکنا ن اور مہاجر نوجوانوں کو شناخت کرکے اغواء کرنے کے بعد انکو ذبح کیا اور انکے ساتھ جنسی بد فعلیاں کیں آج پیپلز امن کمیٹی کے و ہ تمام افراد لندن میں موجود ہیں اور ایسے میں الطا ف حسین کے خلا ف بلاول زرداری کا بیان تشویشناک ہے ایم کیو ایم رابطہ کمیٹی نے اپنے ہنگامی اجلاس میں فیصلہ کیاہے کہ بلاول زرداری کے متعصب بیان کو مختلف زاویوں سے جانچنے کے بعد کراچی اور برطانیہ میں قانونی ، سیاسی اور آئینی طریقوں سے قانونی چارہ جوئی اور ملک گیر احتجا ج بھی کئے جائیں گے، ہم اس حوالے سے برطانوی حکومت اور میٹ پولیس سے الطاف حسین کے تحفظ کے لئے رابطے میں ہیں ۔حیدر عباس رضوی نے کہا کہ جب سے الطاف حسین نے ملک میں نئے انتظامی یونٹس او ر مزید صوبے بنانے کا عوامی مطالبہ کیا ہے اس وقت سے ملک بھر بالخصوص سندھ میں جاگیر داروں ، وڈیروں اور کرپٹ سیاستدانوں میں کھلبلی مچ گئی ہے اور وہ الطاف حسین کے خلاف سازشوں میں مصروف ہیںلیکن یہ بات سب کو سمجھ لینی چاہئے کے نئے صوبے پاکستان کا مقد ر ہیں اور اس اقدام کو طاقت، دھونس ، دھمکی کے ذریعے نہیں روکا جاسکتا ، پیپلز پارٹی آج صرف دیہی سندھ کی جماعت بن کر رہ گئی ہے اور اس قسم کے ہتھکنڈوں سے شہرت حاصل کرنا چاہتی ہے، ایم کیو ایم کے ارکان اسمبلی عید کے بعد سینیٹ ، قومی اسمبلی اور سندھ اسمبلی میں پیپلز پارٹی کے ذمہ داران سے بلاول زرداری کے مذکورہ بیان کی وضاحت طلب کریں گے کہ کیا یہ ذوالفقار مرزا جیسی کسی ایم کیو ایم دشمن پالیسی کی پیروی ہے یا پھر ایم کیو ایم کے خلاف کوئی نئی سازش کا حصہ ہے؟، انہوں نے کہا کہ بلاول زرداری شاید اس بات سے لاعلم ہیںکہ جس وقت پنجاب میں آصف علی زرداری کو گھسیٹنے اور کھینچے کی باتیں کی جارہی تھیں اس وقت کسی جیالے کی ہمت نہیں تھی کہ وہ ان جماعتوں کو جواب دیتا لیکن الطاف حسین نے تمام تر ذاتی اختلافات کو بھلا کرآصف علی زرداری کی حمایت میں بیان دیے تھے، انہوں نے کہا کہ ایم کیوایم کے ذمہ داران خدمت خلق فاؤنڈیشن کی مدد کے لئے قربانی کی کھالوں کو اکھٹا کرنے میں مصروف ہیں اور ہم عید کے بعد اپنے آئندہ لائحہ عمل کا اعلان کریں گے تاکہ عوام کو کسی پریشانی کا سامنہ نا کرنا پڑے ۔