لندن......متحدہ قومی موومنٹ کے قائد الطاف حسین نے پاکستان اور لندن کی رابطہ کمیٹی کے ایک مشترکہ اجلاس سے خطاب کرتے ہوئے ملک کی مجموعی اور اندرونی و بیرونی صورتحال کا جائزہ لیاجس میںلاء اینڈ آرڈرکامسئلہ سرفہرست شامل تھا۔اس موقع پر الطاف حسین نے اراکین رابطہ کمیٹی(پاکستان) تمام سیکٹروں اورتمام یونٹوں کو ہدایت کی کہ وہ پیپلز پارٹی کے مقامی رہنماؤں سے رابطہ رکھیں اور جہاں جہاں انہیں ایم کیو ایم کے تعاون کی ضرورت ہو وہ انہیں غیر مشروط طورپرفراہم کریں ۔ آخر میںالطاف حسین نے پیپلزپارٹی کے جلسہ کی کامیابی اور ساتھ خیریت سے ہونے کیلئے اپنی نیک خواہشات کابھی اظہار کیا ۔دریں اثنا الطاف حسین نے خیبر ایجنسی کی وادی تیراہ میں خود کش بم دھماکہ کی سخت ترین الفاظ میں مذمت کی ہے اور دھماکہ کے نتیجے میں متعدد افراد کے شہید اور زخمی ہونے پر گہرے دکھ اور افسوس کااظہا رکیا ہے ۔ ایک بیان میں انہوں نے کہا کہ وادی تیراہ میں خود کش دھماکہ پاک فوج کی جانب سے دہشت گردوں کے خلاف جاری آپریشن ضرب عضب کا ردعمل ہے، پاک فوج نے آپریشن ضرب عضب کے نتیجے میں دہشت گردوں اور ان کے متعدد ٹھکانوں کا خاتمہ کیا ۔انہوں نے کہاکہ وادی تیراہ میں خود کش دھماکہ اس بات کا متقاضی ہے کہ آپریشن ضرب عضب کو مزید تیز تر کیاجائے اور اسے ملک میں قائم دہشت گردوں کے ٹھکانوں کے مطابق توسیع دی جائے اور ملک بھر سے دہشت گردو ںکا جلد از جلد قلع قمع کرکے عوام کو جا ن ومال کا تحفظ فراہم کیاجائے، ملک میں دہشت گردی کے باعث امن و امان ، معاشی اور اقتصادی صورتحال بد تر ہوتی جارہی ہے ، کوئی سرمایہ کاری تو کجا کھیلنے کیلئے آنے کو تیار نہیں ہے، یہ صورتحال نازک ترین ہے اور ملک کی بقاء و سلامتی کیلئے سنجیدہ فیصلوں اور حکمت عملی کو اختیار کرنے کا عندیہ دے رہی ہے ۔ انہوں نے خود کش دھماکہ میں شہید ہونے والے افراد کے تمام سوگوار لواحقین سے دلی تعزیت وہمدردی کااظہا رکرتے ہوئے انہیں صبر کی تلقین اور دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور زخمیوں کو جلد ومکمل صحت یابی عطا کرے ۔ الطاف حسین نے وفاقی اور صوبائی حکومت خیبر پختونخواہ سے مطالبہ کیا کہ بم دھماکہ میں ملوث دہشت گرد وں کے سرپرستوںکو فی الفور گرفتار کیاجائے اور آپریشن ضرب عضب کی کامیابی اور دہشت گردوں کے خاتمہ کیلئے تمام ممکنہ ملکی وسائل اور ذرائع استعمال میں لائے جائیں ۔