Can't connect right now! retry
Advertisement

پاکستان
10 نومبر ، 2017

نوازشریف کی ریفرنسز یکجا کرنے کی درخواست مسترد کرنے کا تفصیلی فیصلہ جاری

اسلام آباد: احتساب عدالت نے سابق وزیراعظم نوازشریف کی تین نیب ریفرنسز کو یکجا کرنے کی درخواست مسترد کرنے کا تفصیلی فیصلہ جاری کردیا۔

میاں نوازشریف نے پاناما کیس میں نیب کی جانب سے دائر تین ریفرنسز کو یکجا کرنے کے لیے اسلام آباد ہائیکورٹ میں درخواست دائر کی تھی جس میں عدالت عالیہ نے فیصلہ دیتے ہوئے احتساب عدالت کو نظر ثانی کا حکم دیا تھا تاہم احتساب عدالت نے سماعت کے بعد نوازشریف کی درخواست مسترد کردی تھی۔

جیونیوز کے مطابق اسلام آباد کی احتساب عدالت کے جج محمد بشیر نے نوازشریف کی درخواست مسترد کرنے کا تفصیلی فیصلہ جاری کردیا جو 9 صفحات پر مشتمل ہے۔

تفصیلی فیصلے میں کہا گیا ہےکہ درخواست گزار نے اپنی آسانی کو مدنظر رکھتے ہوئے ریفرنسز یکجا کرنے کی استدعا کی، فریقین کے وکلا کے دلائل سننے کے بعد درخواست خارج کی، حکم نامے کے ذریعے ریفرنسز کر یکجا کرنے کی درخواست خارج کی جاتی ہے۔

فیصلے میں مزید کہا گیا ہےکہ تینوں ریفرنسز میں عائد کیے گئے الزامات مختلف ہیں اور تینوں ریفرنسز میں صرف دو گواہان مشترک ہیں۔

واضح رہے کہ نیب نے شریف خاندان کے خلاف لندن پراپرٹیز، فلیگ شپ انویسٹمنٹ اور العزیزیہ اسٹیل ملز کے تین ریفرنس دائر کیے ہیں جن میں نوازشریف، مریم نواز اور کیپٹن (ر) صفدر پر فرد جرم بھی عائد کی جاچکی ہے جب کہ پاناما کیس میں اسحاق ڈار کے خلاف آمدن سے زائد اثاثوں کا ریفرنس بنایا گیا ہے۔

Advertisement