افغانستان کے شہر جلال آباد میں دھماکا، 8 افراد ہلاک

افغانستان کے مشرقی صوبے ننگر ہار کے دارالخلافہ میں دھماکے سے کم از کم 8 افراد ہلاک اور متعدد زخمی ہو گئے۔

افغان میڈیا کے مطابق جلال آباد میں خود کش بمبار نے عوامی احتجاج کے دوران خود کو دھماکا خیز مواد کی مدد سے اڑا لیا جب کہ حکام کا کہنا ہے کہ پتہ لگایا جا رہا ہے کہ دھماکا خود کش تھا یا پھر بارودی مواد پہلے سے نصب تھا۔

افغانستان کے خبر رساں ادارے طلوع نیوز کے مطابق دھماکے میں کم از کم 8 افراد ہلاک اور 15 زخمی ہوئے۔

میڈیا رپورٹ کے مطابق دھماکا اس وقت ہوا جب عوام کی بڑی تعداد ضلع خیوا میں امن و امان کی خراب صورت حال کے باعث احتجاج کر رہے تھے۔