کراچی......متحدہ قومی موومنٹ کے حق پرست اراکین قومی اسمبلی نے اپنے مشترکہ بیان میں کہا ہے کہ پنجاب اسمبلی کے باہر نابینا افراد کی جانب سے اپنے مطالبات کے حق میں کئے جانے والے احتجاج کا نوٹس لیا جائے اور ان کے جائز مطالبات فی ا لفور مان لئے جائیں۔حق پرست اراکین قومی اسمبلی نے کہا کہ پنجاب حکومت کی جانب سے نابینا افراد کے ساتھ سختی کا عمل درست فیصلہ نہیں لہٰذا ایسے کسی بھی عمل سے گریز کیا جائے جس سے نابینا افراد کو کوئی مشکلات درپیش آئیں۔ انہوں نے کہا کہ پنجاب پولیس کی جانب سے پہلے بھی اپنے حق کے لئے کئے جانے والے مظاہرے کے دوران نابینا افراد کو تشدد کا نشانہ بنایا گیا تھا اسکے باوجود آج پنجاب حکومت کے ترجمان کی جانب سے دیا جانے والا بیان نا مناسب ہے ۔حق پرست اراکین قومی اسمبلی نے کہا کہ خصوصی افرا د ہمارے معاشرے کا اہم حصہ ہیں انکے مسائل حکومت کی بنیادی اور اولین ترجیحات میں شامل ہونی چاہئیں۔حق پرست اراکین قومی اسمبلی نے وزیر اعظم نواز شریف اوروزیر اعلیٰ پنجاب شہباز شریف سے مطالبہ کیا کہ وہ نابینا افراد کے مطالبات فوری مان کر انہیں ملازمتوں پرمستقل کرادیا جائے۔